თბილისის და ფოთის შემდეგ რუსულნომრიანი მანქანები სენაკშიც გამოჩნდა. ინფორმაციას "ნაციონალური მოძრაობა“ ავრცელებს.

პარტიის წევრის ნუგზარ წიკლაურის ინფორმაციით, რუსული სამხედრო მანქანა სენაკის ტერიტორიაზე რეზერვისტთა სამხედრო ბაზის მიმართულებით გადაადგილდებოდა.

„რუსმა მძღოლმა პირდაპირ ჰკითხა მოქალაქეებს თუ სად მდებარეობს ეს სამხედრო ბაზა და მხოლოდ ამის შემდეგ გააგრძელა სვლა. საგულისხმოა, რომ საპატრულო მანქანა, რომელიც რუსულ ნომრიან მანქანას შეხვდა, არ დაინტერესდა თუ რა მიზნით იმყოფებოდა ის აღნიშნულ ადგილზე. ფაქტია, რომ ოკუპანტი სამხედრო ძალები უკვე უკონტროლოდ გადაადგილდებიან საქართველოს ტერიტორიაზე. ამას, გუშინ, გავრცელებული ფოტოებიც ადასტურებს. ასევე არის ინფორმაცია, რომ რუსული სამხედრო მანქანები დარიალის ხეობაში გადაადგილდებოდნენ. ამასთან დაკავშირებით მთავრობას აბსურდული პასუები ჰქონდა. მოვითხოვთ თავდაცვის მინისტრ ჯანელიძისაგან, გამოვიდეს და მკაფიოდ განუმარტოს ქართულ საზოგადოებას თუ რა მიზნით გადაადგილდებიან რუსული სამხედრო მანქანები საქართველოს ტერიტორიაზე“, - განაცხადა წიკლაურმა.

თბილისში, გაგარინის ქუჩაზე რუსულნომრიანი სამხედრო მანქანები გუშინ გამოჩნდა. ვრცელდებოდა ინფორმაციია, რომ მანქანები რუსეთის სამხედრო კავშირგაბმულობას ეკუთვნის.

ნინი კაციტაძე