"ქართველ კაცს კუჭი რომ უხმება შიმშილით, ამაზე პასუხი ივანიშვილმა უნდა აგოს"

პოლიტიკა - 14:05, 25 Feb, 2015

3287

ყოფილი დეპუტატის, ვალერი გელბახიანის განცხადებით, საქართველოში ანარქიული პროცესებია:

„საქართველოს მთავრობა აღარ ჰყავს , ანარქიული პროცესებია . ხელისუფლებას არც ერთი რგოლის ფუნქცია არ იგრძნობა, ხალხი ძალიან დაბნეულია, პანიკაშია ჩავარდნილი, ეს პროცესები კი აუცილებლად გამოიწვევს სოციალურ აფეთქებებს და აპრილ-მაისში ჩვენ ვიხილავთ ქუჩის სერიოზულ აქციებს.

დღეს მთავრობას ბიძინა ივანიშვილის მიმართ აქვს ვალდებულება აღებული. ამ სახელმწიფოში ხდება ისეთი რამ, რაც მსოფლიოში არსად არ ხდება. უგვირგვინო მეფის სტატუსში მივიღეთ ბატონი ბიძინა ივანიშვილი, მეფე თავის კაბინეტიდან მართავს ქვეყანას. ამიტომ თუ დღევანდელ ვითარებაზე პასუხი ვინმემ უნდა აგოს ეს არის ბიძინა ივანიშვილი და ნუ გაურბის პასუხისმგებლობას. ქართველ კაცს კუჭი რომ უხმება შიმშილით, ბანკიდან ვალი რომ აქვს აღებული და პროცენტები ეზრდება, აი ამაზე უნდა აგოს პასუხი.

ჩვენ დავუბრუნდით შევარდნაძის ხაზის ნიშნულს, ვაღიაროთ, რომ ლარი შევარდნაძის დროს ასე შორს არ გავარდნილა.

რაც ხდება, ეს არის ანარქია და ასეთი სუსტი და უუნარო ხელისუფლება არც ერთ პერიოდში არ გვყოლია დამოუკიდებლობის შემდეგ. თუ პოლიტიკურ ცხოვრებაში ოდესმე რაიმე მახსოვს , დღევანდელი მთავრობა და პარლამენტი არის ყველაზე სუსტი“- აცხადებს ვალერი გელვახიანი გაზეთ „ალიასთან“ ინტერვიუში.