ჩვენ ქვეყნის გასაერთიანებლად ყველა სამშვიდობო ბერკეტს გამოვიყენებთ -ირაკლი ღარიბაშვილი

პოლიტიკა - 10:29, 25 Feb, 2015

1256

საქართველოს პრემიერ-მინისტრი ირაკლი ღარიბაშვილი ოკუპაციის დღესთან დაკავშირებით სპეციალურ განცხადებას ავრცელებს, პრემიერის განცხადებით 94 წლის წინ ქართველი პატრიოტების თავგანწირვის მიუხედავად ქვეყნის სამწლიანი დამოუკიდებლობა ტრაგიკულად დასრულდა, თუმცა ქართველ ხალხში თავისუფლების იდეა და დამოუკიდებლობისკენ სწრაფვა არასოდეს ჩამკვდარა:
:25 თებერვალი ერთ-ერთი ყველაზე ტრაგიკული თარიღია ჩვენი ქვეყნის უახლეს ისტორიაში. 94 წლის წინ ქართველი იუნკერებისა და პატრიოტების თავგანწირვამ ვერ იხსნა ჩვენი სამშობლო წითელი ოკუპაციისაგან და ჩვენს ქვეყანაზე, ერის საუკეთესო ნაწილი შეეწირა თავისუფლებისათვის ბრძოლას. კომუნისტური იდეოლოგიისა და რეჟიმის მიუხედავად, თავისუფლების იდეა და დამოუკიდებლობისკენ სწრაფვა არასოდეს ჩამკვდარა ხალხში, არასოდეს შეწყვეტილა თავისუფლებისათვის ბრძოლა.
დღეს საქართველო დამოუკიდებელი ქვეყანაა და ეს მრავალი თაობის თავდადების შედეგია. ჩვენი ვალია გავუფრთხილდეთ ამ უდიდეს მონაპოვარს, შევინარჩუნოთ და გავაძლიეროთ ჩვენი ქვეყანა.
საქართველოს ნაწილი ისევ ოკუპირებულია, მაგრამ ჩვენ არასოდეს შევეგუებით ამას და ყველა სამშვიდობო ბერკეტს გამოვიყენებთ ჩვენი ქვეყნის გასაერთიანებლად. მჯერა, ჩვენ შევძლებთ მომავალ თაობას დავუტოვოთ გამთლიანებული და წარმატებული სახელმწიფო."- აღნიშნულია პრემიერის განცხადებაში.

_{ნინო ზედგენიძე}