ექსპერტი თორნიკე შარაშენიძე ზურაბ აბაშიძის განცხადებას ეხმაურება, რომლის მიხედვით ის მოხარული იქნება თუ აფხაზეთთან და ცხინვალთან დიალოგში რუსეთი ხელს შეუწყობს.

შარაშენიძე „ნიუპოსტთან“ საუბარში ამბობს, რომ რუსეთთან ურთიერთობის საკითხებში პრემიერის სპეციალური წარმომადგენლისგან მსგავსი განცხადება გასაკვირი არ არის.

„ამ კაცის ფუნქცია არის რუსეთთან მოლაპარაკებები და როდესაც ეს კაცი აკეთებს განცხადებას, რომ ნატო, რუსეთს საფრთხეს არ უქმნის, ეს არ უნდა იყოს განმსაზღვრელი ნატოს მიმართ პოლიტიკის. ნატოსთან ურთიერთობა უნდა მოკითხონ საგარეო საქმეთა, თავდაცვის და ევროპული ინტეგრაციის სამინისტროებს. სიმართლე გითხრათ, როცა ნატოსთან დაკავშირებით ამ კაცის განცხადებებზეც კეთდება მწვავე შეფასებები, ცოტა მიკვირს. შეიძლება მას რაღაცეებში არ ვეთანხმებოდე, მაგრამ ამ კაცის ფუნქცია არის რუსეთთან ურთიერთობის დალაგება და მისი გამონათქვამები ამ კონტექსტში უნდა განვიხილოთ. ლავროვის გიჟურ განცხადებაზე ისე პაუსხობს ხოლმე, ცდილობს რაღაცნაირად დააწყნაროს“, - აცხადებს შარაშენიძე.

თუმცა ექსპერტი ამბობს, რომ აბაშიძემ ეს განცხადება ზრდილობის გამო გააკეთა და რეალურად რუსეთი აფხაზეთთან და ცხინვალთან დიალოგში არ დაგვეხმარება.

„რუსეთი დიალოგში არ დაგვეხმარება. ამის ილუზია არ გვაქვს. ზრდილობის გამო თქვა, რომ მივესალმები თუ დაგვეხმარებიანო. უფრო მეტიც, დარწმუნებული ვარ არაფერი გამოვა აფხაზეთთან მოლაპარაკებებიდან. სამწუხაროდ, ისინი სხვა პლანეტაზე არიან სამწუხაროდ“, - განაცხადა შარაშენიძემ.

პრემიერის სპეციალური წარმომადგენელი რუსეთთან ურთიერთობის საკითხებში ზურაბ აბაშიძე, „რია ნოვისტისთან“ მიცემულ ინტერვიუში აცხდებს, რომ საქართველო, აფხაზეთთან და სამხრეთ ოსეთთან დიალოგის ახალ შესაძლებლობებს განიხილავს და მოხარული იქნება, თუკი რუსეთი მათთან პირდაპირ კონტაქტს შეუწყობს ხელს.

ნინო დათაშვილი