პრემიერ-მინისტრის სპეციალური წარმომადგენელი რუსეთთან ურთიერთობის საკითხებში, ზურაბ აბაშიძე, „რია ნოვისტისთან“ მიცემულ ინტერვიუში აცხდებს, რომ საქართველო, აფხაზეთთან და სამხრეთ ოსეთთან დიალოგის ახალ შესაძლებლობებს განიხილავს და მოხარული იქნება, თუკი რუსეთი მათთან პირდაპირ კონტაქტს შეუწყობს ხელს.

"თუკი დიალოგი დაიწყება და რუსეთი ამ საკითხს ხელს შეუწყობს, მზად ვართ სტატუსთან დაკავშირებული საკითხები გვერდზე გადავდოთ, დისკუსია კი, ისეთ კონკრეტულ საკითხებზე გავმართოთ, როგორიცაა ჰუმანიტარული, ეკონომიკური, ჯანდაცვისა და განათლების საკითხები. მოდით, გავმიჯნოთ ერთმანეთისგან წითელი ხაზი და ადამიანური პრობლემები" - განაცხადა აბაშიძემ.

ცოტა ხნის წინ, რუსეთის პრეზიდენტმა, ვლადიმერ პუტინმა განაცხადა, რომ აუცილებელია თბილისმა აფხაზეთსა და სამხრეთ ოსეთთან პირდაპირი პოლიტიკური დიალოგი დაიწყოს. ამავე დროს, პუტინმა დასძინა, რომ მოსკოვი მზად არის ამაში თავისი წვლილი შეიტანოს.

„თუკი მოსკოვი, დიალოგის ხელშეწყობით ნამდვილად არის დაინტერესებული, ამას მალე დავინახავთ“- აღნიშნა აბაშიძემ თან დასძინა, რომ საქართველოს ხელისუფლება აფხაზეთსა და სამხრეთ ოსეთთან ურთიერთობის მოგვარების, მხოლოდ მშიდობიან გზას განიხილავს.

შეგახსენებთ, რუსეთ-საქართველოს დიალოგის ორი სახე არსებობს - ჟენევის დისკუსიები და აბაშიძე-კარასინის სისტემატიური შეხვედრები, პრაღაში.

პრაღაში, აბაშიძე-კარასინის მორიგი შეხვედრა, 26 თებერვალს არის დაგეგმილი.

ხატია ლაღიძე