არასამთავრობო ორგანიზაცია "დემოკრატიული ჟანგბადის" დამფუძნებელს "ნაციონალური მოძრაობა" ხელისუფლებასთან კავშირში ამხელს და აცხადებს, რომ ორგანიზაცია დაფინანსებას ხელისუფლებისგან იღებს. თავად ორგანიზაციის ხელმძღვანელი ლევან ჯაში კი ერთდროულად ორ სახელმწიფო სტრუქტურაში მუშაობს- შს სამინისტროში და აჭარის მთავრობაში.

შინაგან საქმეთა სამინისტრო აღნიშნულ ფაქტს უარყოფს, თუმცა თავად ლევან ჯაშის განცხადებით ის უწყებაში 2013-2014 წლებში მუშაობდა, ჯაში ასევე ადასტურებს იმას, რომ ის დღემდე არის აჭარის მთავრობის თავჯდომარის თანაშემწე და კურირებს კონკრეტულად ეკონომიკის საკითხებს.

„რა შუაშია ყოფილი სამსახურები და თუნდაც ახლანდელი. აჭარაში ეკონომიკურ სფეროზე კურირებას ვაწარმოებ ჩემ არასამთავრობოსთან, რომლის დამფუძნებელიც ვარ მე და ხელფასს იქიდან არ ვიღებ. საქართველოს კანონმდებლობით მე არ მეკრძალება ვიყო არასამთავრობო ორგანიზაციის დამფუძნებელი. დამოუკიდებლობის და მიუკერძოებლობის გარანტია ამ შემთხვევაში არის ის რომ სისტემა მთლიანად არის აგებული მათემატიკაზე, თავის თავში გამორიცხავს სუბიექტურობას."- აცხადებს ჯაში.

"დემოკრატიული ჟანგბადის" დამფუძნებელი განმარტებას მაგდა კოტრიკაძის პიროვნებასთან დაკავშირებითაც აკეთებს, რომელიც "ნაციონალური მოძრაობის" ინფორმაციით ივანიშვილის დაცვის წევრის მეუღლე და ამავდროულად ორგანიზაცია "დემოკრატიული ჟანგბადის" თანამშრომელია. ჯაში კოტრიკაძესთან არაოფიციალურად თანამშრომლობას ადასტურებს, თუმცა აცხადებს, რომ მან არ იცის, არის თუ არა ის ივანიშვილის დაცვის მეუღლე:

"მაგდა კოტრიკაძე ოფიციალურად არ არის გაფორმებული, მაგრამ თანამშრომლობს, როგორც პიართან ურთიერთობის დარგში. დიახ მუშაობს იმიტომ რომ ჩემი ბავშვობის მეგობარია. ვინ ბიძინა ივანიშვილის დაცვის წევრის მეუღლეა არ ვიცი,“- განაცხადა ლევან ჯაშმა "კურიერის" ერთერში.