,,შეიძლება წააგო ომი, მაგრამ მაინც გაიმარჯვო“ - პრეზიდენტი იუნკერთა გმირობაზე

პოლიტიკა - 14:18, 23 Feb, 2015

1976

დღეს საქართველოს პრეზიდენტი გიორგი მარგველაშვილი, 1921 წელს, კოჯორ-ტაბახმელას მიდამოებში გარდაცვლილი იუნკერების ხსოვნისადმი მიძღვნილ ღონისძიბაზე სიტყვით გამოვიდა და მათ ხსოვნას პატივი მიაგო. მარგველაშვილის თქმით, სწორედ იუნკერთა გმირობა იყო ის საფუძველი, რომელმაც საქართველო დამოუკიდებლობამდე მიიყვანა.

„შეიძლება წააგო ომი, მაგრამ მაინც გაიმარჯვო და შენი თავდადებით, ვაჟკაცობით, სულის სიძლიერით დათრგუნო მტერი. მაშინ, როდესაც ჩვენ წავაგეთ ის ბრძოლები, რომლებმაც საქართველოს ხანმოკლე დამოუკიდებლობას მაშინ ბოლო მოუღო, იუნკერთა გმირობამ ჩააგდო ის ფესვი, რომელმაც საქართველოს დამოუკიდებლობა მოგვიანებით მოუტანა.

დღევანდელი სახელმწიფოს წარმომადგენლები ვეუბნებით მათ მადლობას, რადგან მათმა გმირობამ მისცა ბიძგი ეროვნულ მოძრაობას, გაუტეხელობას სულისა და იმ გამარჯვებებს, რომელმაც ჩვენი ქვეყანა დამოუკიდებლობამდე მიიყვანა,. ამ გამარჯვებებს, რა თქმა უნდა აქვს მომავალი, რადგან საქართველო უნდა იყოს ძლიერი, დამოუკიდებელი და მას ვერავინ ვერასდროს უკარნახოს როგორ იცხოვროს“, - განაცხადა გიორგი მარგველაშვილმა.

მარგველაშვილის თქმით, დღეს ჩნდება რწმენა, რომ საქართველო ძლიერი და დამოუკიდებელი იქნება.