„ნაციონალური მოძრაობა“ აჭარის უმაღლეს საბჭოში განვითარებულ მოვლენებზე პრემიერის მიერ გაკეთებულ განცხადებას ეხმაურება.

როგორც პარტიაში აცხადებენ, ირაკლი ღარიბაშვილი საბჭოს წევრებს ემუქრება.

„იმის მაგივრად, რომ პრემიერი ღარიბაშვილი დაკავებული იყოს იმით, რაც საქართველოს მოსახლეობას ყველაზე მეტად აწუხებს, ეს არის ჩამოშლილი ეკონომიკა, გაუფასურებული ლარი და ეკონომიკური კრიზისი, ის დაკავებულია იმით, რომ სრულიად არადემოკრატიული წესით ემუქრება ადამიანებს, რომლებმაც გადაწყვეტილება თავისი პოლიტიკური შეხედულებების მიხედვით მიიღეს,“ - განაცხადა „ნაციონალური მოძრაობის“ წევრმა გოკა გაბაშვილმა.

პრემიერ-მინისტრის თქმით, აჭარის უმაღლეს საბჭოში მიმდინარე მოვლენებზე მკაცრი რეაგირება იქნება. ირაკლი ღარიბაშვილი ფიქრობს, რომ საბჭოში მიმდინარე მოვლენები „ქართული ოცნების“ ყოფილი წევრების მიერ დაგეგმილი პროვოკაციაა.