უკრაინაში მივდივართ ყველა, ვინც თვითმფრინავში ჩავეტევით- გიორგი მარგველაშვილი

პოლიტიკა - 00:12, 21 Feb, 2015

6829

საქართველოს პრეზიდენტის განცხადებით დღეს უკრაინას უჭირს და ბუნებრივია რომ ქართული საზოგადოება და სახელმწიფო უკრაინელების გვერდით დგას და ტერიტორიული მთლიანობის, სუვერენიტეტისა და დამოუკიდებელი არჩევანის დაცვაში მხარს უჭერს. ამის შესახებ საქართველოს პრეზიდენტმა გიორგი მარგველაშვილმა საზოგადოებრივი მაუწყებლის ეთერში განაცხადა.

პრეზიდენტის განცხადებით, იმ დელეგაციის შემადგენლობაში, რომელიც ხვალ უკრაინაში მიემგზავრება, საპარლამენტო უმრავლესობის, უმცირესობის და ოპოზიციის წარმომადგენლები იქნებიან.

„დელეგაციაშიც სწორედ ამ აქცენტით ვიქნებით გაერთიანებული. დელეგაციაში ასევე, იქნება წარმოდგენილი აღმასრულებელი შტო. მაქსიმალურად შევეცდებით, ჩვენი ვიზიტით ვაჩვენოთ, რომ უკრაინის სახელმწიფოს და ხალხის მხარდაჭერა არც ერთი პოლიტიკური პარტიის და ლიდერის მხარდაჭერა არ არის, არამედ ის მთელი მსოფლიოსა და უკრაინელების მიმართ, ქართველი ხალხის ნათელი გზავნილია, არ უნდა გვეგონოს ჩვენი თავი ისეთი ფიგურები, რომლებსაც შეუძლიათ შეცვალონ და დაანგრიონ ერთა შორის მეგობრობა. ჩემს, სააკაშვილს და სხვა პოლიტიკოსებს ზემოთ არის ჩვენი ქვეყნების მეგობრობა და ძმობა. უხერხულობები შეიქმნება, თუმცა ამ უხერხულობებს, როდესაც განსაკუთრებით უკრაინა არის დაძაბულ ვითარებაში, უნდა მოვემსახუროთ ისე, რომ არ იყოს მძაფრი. უხერხულობები არის, მაგრამ ურთიერთობებს საფრთხე არ ემუქრება. ამის დასადასტურებლად მივდივართ ყველა, ვინც ასე ვთქვათ, თვითმფრინავში ჩავეტევით, რათა უკრაინელებს ვაჩვენოთ, რომ მათ გვერდში ვდგავართ. დღეს უკრაინას უჭირს და ქართული საზოგადოება და ქართული სახელმწიფო დგას უკრაინელების გვერდით და მხარს უჭერს თავისი ტერიტორიული მთლიანობის, სუვერენიტეტისა და თავისუფალი არჩევანის დაცვაში", - აღნიშნა მარგველაშვილმა.

უკრაინაში, 21 თებერვალს მაიდნის მოვლენებისადმი მიძღვნილ ღონისძებებს საქართველოს პარლამენტის წევრებიც დაესწრებიან. კიევში პრეზიდენტი გიორგი მარგველაშვილიც მიდის.