ინტერპარტიული ჯგუფის წევრები საქართველოში აშშ-ს ელჩს შეხვდნენ. არასაპარლამენტო ოპოზიციის წარმომადგენლებმა რიჩარდ ნორლანდს თავიანთი ხედვა გააცნეს იმასთან დაკავშირებით თუ რატომ და როგორ უნდა შეიცვალოს საარჩევნო სისტემა. საარჩევნო გარემოს გაუმჯობესების მიზნით ოპოზიციის წარმომადგენლები მაჟორიტარული წესის გაუქმებას ითხოვენ.

გიორგი ახვლედიანის განცხადებით, მათ აშშ-ს ელჩთან ერთმანდატიანი მაჟორიტარული სისტემის პროპორციული სისტემით შეცვლაზე ისაუბრეს, ელჩისგან კი დაპირება მიიღეს , რომ ის თავის მხრივ მხარს დაუჭერს და თვალყურს მიადევნებს მოლაპარაკებების პროცესს.

ჯონდი ბაღათურიას განცხადებით ელჩთან შეხვედრის მთავარი ამოცანა მოლაპარაკებების პროცესში მხარდაჭერის მიღება და საერთაშორისო საზოგადოების სწორი ინფორმირება იყო. ამასთანავე ბაღათურიამ საარჩევნო სისტემის შეცვლის საკითხზე კონფერენციის ჩატარებაც დააანონსა და განაცხადა, რომ კონფერენციაზე შემუშავდება დოკუმენტი, რომელსაც ხელს პარტიების და არასამთავრობო ორგანიზაციების წარმომადგენლები მოაწერენ ხელს.

როგორც ახალი მემარჯვენეების ერთერთი ლიდერი მამუკა კაციტაძე აცხადებს, ამერიკის საელჩო ისედაც ჩართულია ქვეყანაში დემოკრატიული პროცესების განვითარების საქმეში, ელჩისგან კი ამ პროცესებში უფრო აქტიური მონაწილეობის დაპირება მიიღეს, რათა საარჩევნო სისტემის გაუმჯობესება ფართო კონსესუსის საფუძველზე მოხდეს.

„ეროვნულ დემოკრატიული პარტიის“ ლიდერი ბაჩუკი ქარდავას განცხადებით, ინტერპარტიული ჯგუფი საარჩევნო სისტემის ცვლილებების საკითხთან დაკავშირებით, საერთაშორისო ორგანიზაციებთან აქტიურ მუშაობას ახორციელებს და მსგავსი მუშაობა მომავალშიც სისტემატიურად იგეგემება. ქარდავას თქმით აზრების შეჯერება არასაპარლამენტო, საპარლამენტო ოპოზიციასა და არასამთავრობო სექტორს შორის უკვე მოხდა.

„ერთადერთი ვინც თავს იკავებს ამ პროცესში ჩართვისაგან, არის უმრავლესობის უმრავლესობა, რომელსაც აქვს საშუალება რეალურად გააჯანსაღოს საარჩევნო გარემო და დემოკრატიული არჩევნების ჩატარებას შეუწყოს ხელი.“- აღნიშნა ბაჩუკი ქარდავამ. „ედპ“-ს ლიდერის თქმით, ხელისუფლებები რომლებიც ხელს არ უწყობდნენ ჯანსაღი საარჩევნო გარემოს განვითარებას, კარგად არ ამთავრებდნენ და ის ხელისუფლებას ურჩევს წინამორბედების ბედი არ გაიზიაროს.

შეგახსენებთ, აშშ-ს ელჩთან შეხვედრამდე ინტერპარტიული ჯგუფის წევრებმა შეხვედრები პარლამენტის თავმჯდომარესთან, პრეზიდენტთან და ადგილობრივი არასამთავრობო ორგანიზაციის წევრებთან გამართეს. ჯგუფის წევრების შეხვედრა ნატოს და ევროკავშირის წარმომადგენლებთან მომავალ კვირასაა დაგეგმილი .

_{ნინო ზედგენიძე}