„ახალი მემარჯვენეების“ ერთ-ერთი ლიდერი მამუკა კაციტაძე პრემიერს საარჩევნო სისტემის მიმართ გულგრილობაში ადანაშაულებს.

„ნიუპოსტთან“ საუბარში კაციტაძე იმ ფაქტს აპროტესტებს, რომ ირაკლი ღარიბაშვილმა, საარჩევნო გარემოს გაუმჯობესებაზე მომუშავე ინტერპარტიული ჯგუფის წევრებთან შეხვედრა ამ დრომდე ვერ მოახერხა.

„დღეს ვაპირებთ შეხვედრას ამერიკის ელჩთან. მასთან საარჩევნო საკითხებზე ვისაუბრებთ. ძირითადი თემა საარჩევნო სისტემა იქნება. აღნიშნულ საკითხებზე ჩვენს მოსაზრებებს გავაცნობთ. ეს არ არის გამონაკლისი ელჩთან შეხვედრა, ჩვენ მთელი ციკლი ჩავატარეთ შეხვედრების როგორც პოლიტიკურ ორგანიზაციებთან ისე არასამთავროვო ორგანიზაციებთან, შევხვდით პარლამენტის თავმჯდმარეს და პრეზიდენტს. მომავალ კვირას შევხვდებით ნატოს და ევროკავშირის წარმომადგენლებს. ერთი სიტყვით, ყველას ვაცნობთ იმ სიმართლეს, რაც ჩვენს პოზიციაშია. ერთიანი ძალისხმევით ვცდილობთ, გავალღოთ ის ყინული, რაც „ქართულ ოცნებაშია“. სამწუხაროდ, პრემიერმა ვერ თუ არ გამონახა ჩვენთან შესახვედრად დრო და აგრძელებს თვითიზოლაციას. ეს სხვას არაფერს ნიშნავს, რომ მას არ უნდა სისტემის შეცვლა, მას უნდა „ნაციონალური მოძრაობის“ საარჩევნოს სისტემის შენარჩუნება, რათა უფრო იოლად მოიპაროს მანდატები პარლამენტში და საკრებულოში“, - განაცხადა მამუკა კაციტაძემ.

შეგახსენებთ, ინტერპარტიული ჯგუფის წევრები დღეს საქართველოში აშშ-ს ელჩს რიჩარდ ნორლანდს ხვდებიან. მანამდე ისინი პარლამენტის თავმჯდომარეს, პრეზიდენტს და ადგილობრივ არასამთავრობო ორგანიზაციის წევრებს შეხვდნენ. მომავალ კვირას დაგეგმილია ინტერპარტიული ჯგუფის წევრების შეხვედრა ნატოს და ევროკავშირის წარმომადგენლებთან.

ნინო დათაშვილი