მაიდნის მოვლენების ერთი წლის თავზე საპრეზიდენტო ბიბლიოთეკაში ხვალ გამოფენა გაიხსნება

პოლიტიკა - 23:14, 19 Feb, 2015

1416

მაიდანის გადამწყვეტი დღეების ერთი წლის თავზე 20 თებერვალს 17.00 საათზე, სააკაშვილის საპრეზიდენტო ბიბლიოთეკაში გაიმართება ფოტოგამოფენის „საქართველო უკრაინისთვის 2014“ საზეიმო გახსნაზე.

,,2014 წელს უკრაინა თითოეული ჩვენთაგანის ცხოვრების ნაწილი გახდა. ყველამ თვალნათლივ დაინახა, რომ ჩვენს ქვეყნებში მიმდინარე პროცესები იმდენად გადაჯაჭვულია, რომ გამოსავლის ძიება ჩვენი საერთო ბრძოლაა. ალბათ არც ერთ სხვა ქვეყანაში ამ წლის განმავლობაში არ ჩატარებულა ამდენი მხარდამჭერი სხვადასხვანაირი აქცია, როგორც საქართველოში. ამ, ხშირად სპონტანურ პროცესებში, უამრავი განსხვავებული პოლიტიკური იდეოლოგიის, პროფესიის, ქალაქის, ინტერესების და ასაკის ადამიანი იყო ჩართული.

ჩვენი საერთო ბრძოლა ჯერ არ დასრულებულა. თუმცა 2014 წელი განსაკუთრებულად დარჩება ჩვენი ქვეყნების ურთიერთობის ისტორიაში“ - ნათქვამია საპრეზიდენტო ბიბლიოთეკის განცხადებაში.

გამოფენაზე წარმოდგენილი იქნება როგორც პროფესიონალი ფოტოგრაფების, ასევე აქციების მონაწილეთა ისტორიული ფოტოები, ნაჩვენები იქნება უკრაინისადმი მიძღვნილი ვიდეო-არტის ნამუშევრები. გამოფენის გახსნის ცერემონიას დაესწრებიან უკრაინის საელჩოს, არასამთავრობო ორგანიზაციების და მედიის წარმომადგენლები.