ჩვენ აქტიურად ვმუშაობთ ევროატლანტიკური ინტეგრაციის მიმართულებით- ბერუჩაშვილი

პოლიტიკა - 15:17, 19 Feb, 2015

1293

საქართველოს საგარეო საქმეთა მინისტრის თქმით, ევროპული და ევროატლანტიკური ინტეგრაცია საქართველოს საგარეო პოლიტიკის პრიორიტეტია და იგი ქართველი ხალხის თავისუფალ არჩევანს ეფუძნება.

„მე შემიძლია დავადასტურო მკაფიოდ და ცხადად, რომ საქართველოსთვის ევროპული და ევროატლანტიკური ინტეგრაცია არის საგარეო პოლიტიკის ძირითადი პრიორიტეტი. ეს ეფუძნება ქართველი ხალხის თავისუფალ არჩევანს და ურყევ ნებას. რეალურად, ამ საკითხების გადაწყვეტა, შეთანხმება და პროგრესი არის შეთანხმება საქართველოს და ნატო-ს, ალიანსის წევრ ქვეყნებს შორის. ასევე მინდა შეგახსენოთ, რომ 2008 წელს, ნატო-ს ბუქარესტის სამიტმა მიიღო გადაწყვეტილება, რომ საქართველო გახდება ნატო-ს წევრი. ჩვენ აქტიურად ვმუშაობთ ამ მიმართულებით", - განაცხადა თამარ ბერუჩაშვილმა.

საგარეო უწყევის ხელმძღვანელის თქმით, სკეპტიკოსების კითხვებზე პასუხები ის საქმეები, რეფორმები და კონკრეტული ნაბიჯები იქნება, რომელსაც საქართველოს მთავრობა განახორციელებს.

შეგახსენებთ, რუსეთის საგარეო საქმეთა მინისტრმა სერგეი ლავროვმა გუშინ განაცხადა, რომ რუსეთი მზადაა, პრაქტიკული ნაბიჯები გადადგას თუ ნატო საქართველოს ალიანსში „შეთრევას“ გააგრძელებს. ამასთან, რუსეთთან ურთიერთობის საკითხებში პრემიერ-მინისტრის სპეციალურმა წარმომადგენელმა ზურაბ აბაშიძემ დღეს აღნიშნა, რომ საქართველოს ალიანსთან თანამშრომლობა არანიარად არ არის მიმართული იმ მიზნისკენ, რომ საქართველოში ნატო-ს სამხედრო ინფრასტრუქტურა განლაგდეს. მისივე თქმით, საქართველო არ გადადგამს ისეთ ნაბიჯებს, რომელიც რეგიონულ უსაფრთხოებას ზიანს მიაყენებს. გარდა ამისა, აბაშიძე აღნიშნავს, რომ ბრიუსელშიც, მოსკოვშიც და თბილისშიც კარგად იციან, რომ დღეს და ხვალ საქართველოს ნატო-ში გაწევრიანება დღის წესრიგში არ დგას.

ზურაბ აბაშიძის ამ განცხადებას ხელისუფლების ოპონენტების მხრიდან მწვავე კრიტიკა მოჰყვა.