საქართველოსა და NATO- ს ურთიერთობასთან დაკავშირებით გაკეთებულ განცხადებას მთავრობის სხდომის დასრულების შემდეგ, საგარეო მინისტრის მოადგილის გიგი გიგიაძე გამოეხმაურა. მინისტრის მოადგილის თქმით, საქართველოს და ალიანსის ურთიერთობა ჩვეულ რეჟიმში გრძელდება :

"საქართველოს უმთავრეს პრიორიტეტს, როგორც ვიცით, წარმოადგენს ევროპული და ევროატლანტიკური ინტეგრაცია, ეს არის ჩვენი მოსახლეობის აბსოლუტური უმრავლესობის არჩევანი და ჩვენი, ასე ვთქვათ თავისუფალი ნება, ნატოსთან დაახლოება დამოკიდებული იქნება არამარტო ჩვენს დიალოგზე, არამედ ალიანსის წევრებზე თვითონ და ამაზე მესამე მხარე გავლენას ვერ მოახდენს. ანუ ჩვენი თანამშრომლობა გრძელდება ჩვეულებრივ რეჟიმში".

საგარეო საქმეთა მინისტრის მოადგილემ რუსეთის საგარეო უწყების ხელმძღვანელის სერგეი ლავროვის განცხადება შეაფასა, რომლის მიხედვითაც, თუ NATO საქართველოს ალიანსში "ჩათრევისთვის" პრაქტიკულ ნაბიჯებს გადადგამს, "რუსეთი შესაბამის ზომებს მიიღებს, რათა ამ პროცესებმა მდგომარეობაზე ნეგატიურად არ იმოქმედოს".

"რაც შეეხება განცხადებას, ჩვენ ვფიქრობთ, რომ ამას ჯობს, ბატონმა ზურამ გასცეს პასუხი. ჩვენ ვადასტურებთ, რომ ჩვენი თანამშრომლობა გრძელდება ჩვეულ რეჟიმში. ჩვენი მიზანია რაც შეიძლება დაახლოება ალიანსთან, მაქსიმალურად დაახლოება. გაერთიანებაზე საუბარი, ვფიქრობ ნაადრევია, მაგრამ, არსებული დებულებების შესრულება, არსებითი პაკეტის მიერ განსაზღვრული ასე ვთქვათ, მოთხოვნების დაკმაყოფილება, შესაბამისად, ჩვეულებრივ რეჟიმში ურთიერთობების გაგრძელება. საქართველო აგრძელებს ჩრდილოატლანტიკურ ალიანსთან დაახლოების პროცესს, ეს დაწყებული იყო ძალიან დიდი ხანია. ჩვენ ვადასტურებთ, რომ ევროპული, საქართველოს ევროატლანტიკური ინტეგრაცია არის, რჩება საქართველოს საგარეო პოლიტიკის უმთავრესი პრიორიტეტი" - განაცხადა გიგიაძემ.