ბერუჩაშვილის უწყება მინსკის შეთანხმების ხელმომწერებს ვალდებულების შესრულებისაკენ მოუწოდებს

პოლიტიკა - 10:44, 19 Feb, 2015

1054

საქართველოს საგარეო უწყებამ უკრაინაში შექმნილ ვითარებასთან დაკავშირებით სპეციალური განცხადება გაავრცელა. სამინისტრო აღმოსავლეთ უკრაინში, ქალაქ დებალცევოსა და მის ირგვლივ სეპარატისტების მხრიდან ინტენსიური საბრძოლო მოქმედებების განახლებასთან დაკავშირებით უკიდურეს შეშფოთებას გამოხატავს.

"ეს არის ცეცხლის შეწყვეტის, მძიმე შეიარაღებული ფორმირებებისა და სამხედრო ტექნიკის გაყვანის თაობაზე მინსკში მიღწეული შეთანხმების შესაბამისი მუხლების უხეში დარღვევა, რაც საფრთხის ქვეშ აყენებს მოცემული შეთანხმების შესრულებას. ვითარებას კიდევ უფრო ართულებს ის ფაქტი, რომ სეპარატისტები დღემდე არ აძლევენ საშუალებას ეუთო-ს სპეციალურ სადამკვირვებლო მისიას, მონიტორინგი განახორციელოს დებალცევოსა და მის მიმდებარე ტერიტორიაზე," - ნათქვამია განცხადებაში.

საქართველოს საგარეო უწყება შეთანხმების მხარეებს ვალდებულებების შესრულებისკენ მოუწოდებს

"იმედს გამოვთქვამთ, რომ „ნორმანდიული ფორმატის“ მონაწილეები მაქსიმალურ ძალისხმევას მიმართავენ, ვითარების შემდგომი ესკალაციისა და მისი კონტროლიდან გამოსვლის თავიდან აცილების მიზნით.

"ამასთან, მოვუწოდებთ 2015 წლის 12 თებერვლის მინსკის შეთანხმების ხელმომწერ მხარეებს, სრულად შეასრულონ აღებული ვალდებულებები და პატივი სცენ გაერო-ს უშიშროების საბჭოს მიერ ა.წ. 17 თებერვალს მიღებულ №2202 რეზოლუციას," - ნათქვამია საგარეო უწყების განცხადებაში.