ცხინვალს ნატოს ცენტრი აშფოთებს და ძალის გამოუყენებლობის შესახებ დოკუმენტის მიღებას ითხოვს

პოლიტიკა - 13:23, 18 Feb, 2015

2250

საქართველოს ხელისუფლებისა და ნატოს წარმომადგენლების განცხადებებს, საქართველოში ნატოს სასწავლო ცენტრის განთავსებასთან დაკავშირებით ე.წ სამხრეთ ოსეთის ხელისუფლება საგანგაშოს უწოდებს. ამის შესახებ განცხადება ე.წ სამხრეთ ოსეთის პრეზიდენტის სპეციალურმა წარმომადგენელმა მურატ ჯიოევმა ცხინვალში ეუთოს, გაეროს და ევროკავშირის წარმომადგენლებთან შეხვედრისას 16 თებერვალს გააკეთა.

საერთაშორისო ორგანიზაციების წარმომადგენლები ცხინვალის რეგიონში ჟენევის 31-ე რაუნდის მოსამზადებელი სამუშაოებთან დაკავშირებით იყვნენ ჩასულნი.

„ჩვენ ეს პროვოკაციულ ფაქტორად მიგვაჩნია“- განაცხადა ჯიოევმა.

ჯიოევის აზრით ამ ფაქტორების გათვალისწინებით, ჟენევის დისკუსიების მთავარი ამოცანა ძალის გამოუყენებლობის შესახებ ხელშეკრულების მიღება უნდა გახდეს.

ჯიოევი აღნიშნულ შეხვედრაზე, უკრაინაში განვითარებულ მოვლენებსაც შეეხო და გაცხადა, რომ შეშფოთებულნი არიან უკრაინაში არსებული სიტუაციით და დონბასის სიტუაცია ე.წ სამხრეთ ოსეთის სიტუაციას აგონებს.

„ეს სისხლისღვრა, მშვიდობიანი ადამიანების მსხვერპლი ნათლად გვახსენებს, იმას , რაც სამხრეთ ოსეთმაც გამოიარა“- განაცხადა ჯიოევმა.