საქართველოს ექსპრეზიდენტის მიხეილ სააკაშვილის თქმით, ის არ ნანობს, რომ თავის დროზე ზურაბ ჟვანიას საქმესთან დაკავშირებით FBI-ის დასკვნა არ გამოაქვეყნა.

ამის შესახებ სააკაშვილმა გადაცემა „არჩევანში“ განაცხადა.

მისი თქმით, იმ დროინდელ პროკურორს ზურაბ ადეიშვილს დასკვნის გამოქვეყნება სურდა, თუმცა ამის უფლება არ მისცა.

„ჩემი გადაწყვეტილება იყო, რომ არ გამოქვეყნებულიყო ეს დასკვნა. მიმაჩნია, რომ სწორედ მოვიქეცი. მიმაჩნდა, რომ მისი სახელის გარშემო სპეკულაციები ცუდი იყო ისტორიის და მის წინაშე. ამაზე ვეკამათებოდი ადეიშვილს, რომელიც ამბობდა, ვუთხრათ საზოგადოებას ყველაფერი და თვითონ განსაჯონ რა არის სიმართლეო. ვუთხარი, შენ გგონია საზოგადოებას გაეხარდება, რომ ყველა თეთრეული გამოვფინოთო. ეს არის ადამიანის პირადი ცხოვრება. მე მინდა რომ ჩემი პირადი ცხოვრება იყოს დაცული და არ მინდა, რომ საზოგადოება მივაჩვიოთ რომ ვინმეს ცხოვრებაში ვერევით. დღესაც ასე მიმაჩნია“, - განაცხადა სააკაშვილმა.

რაც შეეხება დასკვნას, სააკაშვილს უკვირს, თუ რატომ არის მოსაზრება, რომ FBI-მ დაწერა ის, რაც საქართველოს მთავრობას უნდოდა.

„ამერიკის კონგრესმა FBI-ის დასკვნის საფუძველზე დაყრდნობით ლამის პრეზიდენტ კლინტონის იმპიჩმენტი მოახდინა. აიღო სინჯები პრეზიდენტის დნმ-ის ცნობილი ქალბატონის კაბიდან და დადო დასკვან, რომ კლინტონი იტყუებოდა. როგორც ფიქრობთ, მათი პრეზიდენტი ლამის ბილ კლინტონი გადააყენეს და სააკაშვილს გაუწიეს ანგარიში და ის დაწერეს, რაც მე მინდოდა?", - განაცხადა სააკაშვილმა.