უკრაინის პრეზიდენტის მრჩეველთა საბჭოს ხელმძღვანელმა, მიხეილ სააკაშვილმა, თოქშოუ "არჩევანში" უკრაინის მთავრობაში კიდევ ერთი ქართველის გამოჩენა დააანონსა.

მისი თქმით, დავით საყვარელიძესთან ერთად უკრაინის პროკურატურაში უახლოეს პერიოდში მუშაობას იურისტი გიზო უგულავა დაიწყებს.

სააკაშვილმა უკრაინის მთავრობაში მყოფ ქართველებზეც ისაუბრა და მათი საქმიანობა დადებითად შეაფასა .

"ის, რაც აქ ხდება, ძალიან ნაცნობია ჩვენთვის. უკრაინელებს ძალიან უნდოდათ აქ გამოცდილი ქართველი პროფესიონალების ჩამოყვანა. მაგალითად, გეტყვით, რომ აქ ძალიან მოსწონთ და უყვართ ეკა ზღულაძე, შეიძლება ითქვას, ბრენდად იქცა უკრაინაში. ეკა იწყებს ახლა პატრულის რეფორმას. ძალიან რადიკალურ რეფორმებს ატარებს. მას აქვს სრული მანდატი და საზოგადოების ნდობა. ანტიკორუფციული პაკეტი სრულად ქართველებმა მოამზადეს. გიორგი ვაშაძე, ზურაბ ადეიშვილი, გიზო უგულავა ჰყავდათ ჩამოყვანილი. ძალიან ჩქარობდნენ ისინი ქართველების ჩამოყვანას. დათო საყვარელიძე დღეს მივიდა პროკურატურაში. მას ჩააბარეს პროკურატურის წმენდა, რადგან იქ არის რთული კორუფციული ფონი, რაც ჩვენთან იყო,"- აცხადებს მიხეილ სააკაშვილი.