საქართველოს პრეზიდენტი გიორგი მარგველაშვილი უზენაესი სასამართლოს თავჯდომარის კანდიდატურასთან დაკავშირებით უმრავლესობის წევრების განცხადებებს ეხმაურება.

მარგველაშვილის თქმით, მისთვის გაუგებარია უმრავლესობის მხრიდან წამოსული პრეტენზიები, ვინაიდან უზენაესი სასამართლოს თავჯდომარის კანდიდატურის შერჩევა იყო ყველაზე ღია და საკმაოდ ხანგრძლივი პროცესი.

„მთელი საზოგადოება ინფორმირებული იყო იმის თაობაზე, თუ ვინ იქნებიან კანდიდატურები და როგორ განიხილებიან ისინი. შესაბამისად ძნელია იმის თქმა, რომ ვინმე რამეზე არ იყო ინფორმირებული, როდესაც ასეთი ღია პროცესია. აქედან გამომდინარე მე მინდა კიდევ ერთხელ ხაზი გავუსვა იმას რომ ასეთი ღია პროცესის შედეგად არასდროს არ დასახელებულა სასამართლოს დავჯდომარის კანდიდატურა. სასამართლოს კანდიდატურის დასახელებისას ნათლად დავეყრდენი იმ კრიტერიუმებს, რომელიც მივიღე პოლიტიკური პარტიებისგან და საზოგადოებრივი ჯგუფებისგან, შესაბამისად ძნელია იმის თქმა, რომ ვინმე არ იცნობს ნინო გვენეტაძეს საქართველოში ან ვინმესთვის არ არის ცნობილი რა კრიტერიუმით დავასახელე მე ქალბატონი ნინო", - განაცხადა გიორგი მარგველაშვილმა.