პრემიერის სპეციალურმა წარმომადგენელმა რუსეთთან მოლაპარაკების საკითხებში, ზურაბ აბაშიძემ სპეციალურ ბრიფინგზე განმარტებები თებერვლის ბოლოს დაგეგმილ აბაშიძე-კარასინის შეხვედრასთან დაკავშირებით გააკეთა, აბაშიძის თქმით შეხვედრაზე მთავარი თემა 2011 წელს გაფორმებული ხელშეკრულება იქნება.

„ამ თვის ბოლოს გაიმართება არაფორმალური შეხვედრა ქართულ-რუსული დიალოგის ფარგლებში, ერთ-ერთი ცენტრალური საკითხი, რომელიც იქ განიხილება , იქნება ხელშეკრულება, რომელიც 2011 წელს გაფორმდა საქართველოსა და რუსეთს შორის, ეს გახლავთ ხელშეკრულება სასაქონლო ვაჭრობასა და საბაჟო ადმინისტრირებასთან დაკავშირებული ძირითადი პრინციპების შესახებ, ამ ხელშეკრულების იმპლიმენტაციის მიზნით შერჩეულია შვეიცარიული კომპანია SGS, რომელმაც უნდა უზრუნველყოს ტვირთების მონიტორინგი.“- აღნიშნა აბაშიძემ

აბაშიძის განცხადებით რუსულ მხარესთან პოზიციების შეჯერება, მოხდება თუ როდის უნდა მოხდეს ამ ხელშეკრულების იმპლიმენტაცია.

აბაშიძის თქმით შეხვედრაზე ასევე განიხილება ქონებრივი, ჰუმანიტარული საკითხები.

შეგახსენებთ, საქართველოსა და რუსეთს შორის 2011 წელს WTO-ს კონტექსტში გაფორმდა ხელშეკრულება, რომლის თანახმადაც აფხაზეთის მიმართულებით სავაჭრო დერეფანში ტვირთების მოძრაობა შვეიცარიის მიერ შერჩეულ ნეტრალურ კომპანიას უნდა გაეკონტროლებინა. აღნიშნული ხელშეკრულება დღემდე არ ამოქმედებულა და მას ვადა 2015 წლის ზაფხულში გადის.