ვინ არის უზენაესი სასამართლოს თავმჯდომარეობის კანდიდატი ნინო გვენეტაძე

პოლიტიკა - 13:19, 17 Feb, 2015

6313

უზენაესი სასამართლოს თავმჯდომარეობის კანდიდატი ნინო გვენეტაძე 1964 წლის 27 იანვარსაა დაბადებული.

გვენეტაძეს 1985-90 წლებში დამთავრებული აქვს ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი. ის სამართლის დოქტორია.

1990-იდან 1993 წლამდე ის საქართველოს მეცნიერებათა აკადემიის სახელმწიფოსა და სამართლის ინსტიტუტში სწავლობდა.

გვენეტაძე 1994-99 წლებში იუსტიციის სამინისტროში საჯარო სამართლის დეპარტამენტის უფროსის მოადგილის თანამდებობაზე მუშაობდა. ასევე იყო სამართლებრივი რეფორმის სახელმწიფო კომისიის სისხლის სამართლის კოდექსის პროექტის შემმუშავებელი კომისიის წევრი.

1998-1999 წლებში ის "საქართველოს ახალგაზრდა იურისტთა ასოციაციის“ თავმჯდომარე იყო.

1999-იდან 2006 წლამდე ნინო გვენეტაძე საქართველოს უზენაესი სასამართლოს სისხლის სამართლის საქმეთა პალატის მოსამართლე იყო.

1999-2008 წლებში ის, პარალელურად, ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის სისხლის სამართლისა და კრიმინოლოგიის კათედრის დოცენტი და ასოცირებული პროფესორი გახდა.

2008 წლის საპარლამენტო არჩევნებში ხაშურში იყრიდა კენჭს რესპუბლიკური პარტიიდან .

გარდა ამისა, გვენეტაძე 2004 წლიდან საქართველოს ახალგაზრდა იურისტთა ასოციაციის იურიდიული განათლების ხელშეწყობის ფონდის გამგეობის წევრი და სისხლის სამართალის პედაგოგიც იყო.

2007 წლიდან დღემდე გვენეტაძე ქართულ-ამერიკული უნივერსიტეტის სამართლის, სოციალური მეცნიერებისა და დიპლომატიის სკოლის პროფესორი და სადოქტორო და სამაგისტრო პროგრამების ხელძღვანელია.