ძალიან სერიოზულ შარში ვართ ყველანი- გიგა ბოკერია

პოლიტიკა - 21:48, 16 Feb, 2015

2583

„ნაციონალური მოძრაობის“ ერთ-ერთმა ლიდერმა გიგა ბოკერიამ „რუსთავი 2“- ის ეთერში ბიძინა ივანიშვილის ინტერვიუსთან დაკავშირებით ისაუბრა და განაცხადა, რომ ყოფილი პრემიერის განცხადებები პოლიტიკური კუთვნილების თუ სიმპათიების მიუხედავად ყველა ადამანის შეშფოთების საგანი ხდება:

„ყველანი მივხვდით, პოლიტიკური კუთვნილების თუ სიმპათიების მიუხედავად, რომ ძალიან სერიოზულ შარში ვართ ყველანი, მთელი ქვეყანა. განსაკუთრებით ეს გვახსენდება ხოლმე, როცა ვუსმენთ იმ კაცს, ვინც მართავს ამ ქვეყანას და ბუნებრივია, განსაკუთრებით იმ, ფონზე, რაც ხდება ქვეყანაში, ეკონომიკაში პირველ რიგში... და ეს ადამიანი ყოველი ახალი გამოსვლის შემდეგ კიდევ უფრო გვიმძაფრებს ამ შეშფოთებას. მთელი საზოგადოებისთვის ნათელი ხდება, რომ არათუ გააზრება არ ხდება არსებული პრობლემებისა - თუ რატომ ხდება ის, რაც ხდება, არამედ, ჯიუტად და საზოგადების შეურაცხყოფების ფონზე ხდება ამ სისულელეების გამეორება. ამ ბოლო გამოსვლის დროსაც, მან განსხვავებული ფორმით, მაგრამ იგივე ხაზი დააფიქსირა, რომ მთავრობა კარგად მუშაობს, საერთოდ კარგი წელი იყო, რაღაც გარე პრობლემები არის, ლარი კარგად იქცევა და არ გაუმეორებია, მაგრამ იგივე სულისკვეთება ჰქონდა, რაც წინა გამოსვლის დროს - რომ ხალხის ბრალია, რადგან არასწორად აბანდებენ ფულს, თორემ სხვა ყველაფერი არის კარგად.“- განაცხადა გიგა ბოკერიამ.