ბიძინა ივანიშვილმა გაზეთ „კვირის პალიტრასთან“ ინტერვიუში იური ვაზაგაშვილის საქმესთან დაკავშირებით, პროკურატურის მუშაობა შეაფასა და განაცხადა, რომ საქმის გახსნასთან დაკავშირებით, პროკურატურის ოპერატიულობა მისასალმებელია. თუმცა ბიძინა ივანიშვილი აღნიშნავს, რომ ყველაზე მნიშვნელოვანი და საინტერესო ამ მკვლელობის დამკვეთია.

ყოფილმა პრემიერმა ვაზაგაშვილის საქმეზე დაკავებულ სოსანაშვილთან დაკავშირებით გაკეთებულ განცხადებებსაც გამოეხმაურა და აღნიშნა, რომ ზოგიერთმა პოლიტიკოსმა უპასუხისმგებლო განცხადებები გააკეთა.

"ერთ-ერთმა ცნობილმა პოლიტიკოსმა ისიც კი განაცხადა, ნაციონალური ტრაგედიაა, რომ პოლიციელი დააკავესო. ვერც ერთ განვითარებულ ქვეყანას ვერ ნახავთ, სადაც პოლიციელს მძიმე დანაშაული არ ჰქონდეს ჩადენილი, გამონაკლისი ვერც საქართველო იქნება. თუმცა, ზოგი პოლიტიკოსი სულ სხვა აქცენტებს აკეთებს, იმის ნაცვლად, რომ პროკურატურის საქმიანობაში პოზიტივი დაინახოს", - განაცხადა ივანიშვილმა.

შეგახსენებთ, ვაზაგაშვილის აფეთქების საქმეზე პოლიციელის დაკავების შემდეგ აღნიშნული შინაარსის განცხადება პარლამენტის თავმჯდომარემ დავით უსუფაშვილმა გააკეთა: ,, ძალიან მნიშვნელოვანი საქმის გახსნა, მაგრამ მეორე მხრივ, ეს არის ეროვნული სირცხვილი, როდესაც პოლიციის თანამშრომელი, ნაცვლად იმისა, რომ იცავდეს ადამიანის უფლებებს, გეგმავს და ახორციელებს ასეთ საზარელ დანაშაულს“- აღნიშნა უსუფაშვილმა.