„რეფორმატორთა კლუბის“ წარმომადგენელი ირაკლი კობიძე არასამთავრობოების და ექსპერტების მისამართით ექსპრემიერის ბიძინა ივანიშვილის განცხადებებს ეხმაურება.

როგორც კობიძემ „ნიუპოსტთან“ საუბარში განაცხადა, ამ შემთხვევაში პრობლემა არის ის, რომ კრიტიკა ქვეყნის ფაქტობრივი მმართველისგან მოდის.

„ეს პირველი შემთხვევა არ არის, როდესაც ამ ადამიანის მხრიდან ხდება განსხვავებული და ხელისუფლების მაკრიტიკებელი აზრის მიმართ მკვეთრი რეაქციის დაფიქსირება. თუმცა აქ პრობლემა იმაში არ არის, რომ შეიძლება ვიღაც ექსპერტი ან არასამთავრობო ორგანიზაცია იქნეს გაკრიტიკებული. აქ პრობლემა არის იმაში, რომ ამგვარი კრიტიკა მოდის ადამიანისგან, რომელიც თავს ასაღებს როგორც დამოუკიდებელი მოქალაქე, არადა ეს არის ადამიანი, რომელიც ქვეყნის რეალური მმართველია. აქ პრობლემა არის თავდასხმა იმ ადამიანისგან, რომელიც არის ამ ქვეყნის ფაქტობრივი მმართველი. ამ კუთხით უნდა დავინახოთ საფრთხე თავისუფალი სიტყვისა და აზრის მიმართ“, - განაცხადა კობიძემ.

მისი თქმით, ექსპრემიერის განცხადებები არასამთავრობოების და ექსპერტების მისამართით შეიძლება ზეწოლადაც ჩაითვალოს.

„შეიძლება ამას დავარქვათ ზეწოლა, რადგან ის ფლობს ყველა სახელმწიფოებირივ ბერკეტს, რომლითაც მას შეუძლია არამართლზომიერი ზემოქმედება მოახდინოს იმ წყაროებზე, რომლებიც გვევლინებიან მისთვის მიუღებელი განსხვავებული აზრის მიმართ“, - განაცხადა კობიძემ.