საქართველოში უკრაინის ელჩი ვასილ ციბენკო მიხეილ სააკაშვილის პეტრო პოროშენკოს მრჩევლად დანიშვნაზე განმარტებას აკეთებს.

როგორც ციბენკომ საგარეო საქმეთა სამინისტროში გამართულ შეხვედრაზე განაცხადა, უკრაინა დამოუკიდებელი სახელმწიფოა და უფლება აქვს, მიიღოს ის გადაწყვეტილება, რომელსაც საჭიროდ ჩათვლის.

მისი განმარტებით, შეხვედრა საგარეო უწყებაში, მშვიდ ვითარებაში ჩატარდა, სადაც ყველა საკითხი კონსტრუქციულ ვითარებაში განიხილეს.

„უკრაინა არის სუვერენული და დამოუკიდებელი სახელმწიფო. მას აქვს უფლება მიიღოს ის გადაწყვეტილება, რომელსაც საჭიროდ მიიჩნევს. ეს ჩვენი ქვეყნის შიდა საქმეა. მეორე არის ის, რომ უკრაინის პრეზიდენტი მიხეილ სააკაშვილის მრჩევლად დანიშვნით უკრაინის ეროვნული ინტერესებიდან გამოვიდა. მან სააკაშვილის გამოცდილება გაითვალისწინა ქვეყნის რეფორმირების და არმიის მოდერნიზების კუთხით. პეტრო პოროშენკო დარწმუნებულია, რომ ეს გადაწყვეტილება არ არის საქართველოს და ქართველი ხალხის წინააღმდეგ მიმართული“, - განაცხადა ციენკომ.

უკრაინის ელჩი საქართველოში საგარეო საქმეთა სამინისტროში მიხეილ სააკაშვილის ახალ თანამდებობასთან დაკავშირებით განმარტებისთვის იყო დაბარებული.