ყოფილი პრემიერი ბიძინა ივანიშვილი არასამთავრობო ორგანიზაციებთან დაკავშირებით მისი განცხადების შემდეგ შექმნილ აჟიოტაჟს ეხმაურება.

როგორც გაზეთ „კვირის პალიტრასთან“ ინტერვიუში ივანიშვილმა განაცხადა, თუ საჭირო გახდა არასამთავრობოებს მომავალშიც გააკრიტიკებს.

"მე სამი არასამთავრობო ორგანიზაციის ხელმძღვანელის გვარი დავასახელე და მათი ორგანიზაციების დამფინანსებლებთან ჩვენ მადლობის მეტი არაფერი გვეთქმის - იქნება ეს "სიდა" თუ ამერიკის მთავრობა. თუმცა, როდესაც ჩნდება კითხვა, რომ კონკრეტული არასამთავრობოს ხელმძღვანელის პოზიცია არ ემთხვევა მისი დამფინანსებლის პოზიციას და ის ჩართულია "ნაციონალური მოძრაობის" ფერხულში, კეთილი ინებონ და გასცენ პასუხი, ან არ გასცენ და მოისმინონ მაინც ეს კრიტიკა.... ვიმეორებ - ყველას, ვინც მე დავასახელე, აქვთ უფლება, უყვარდეთ "ნაციონალური მოძრაობა". თუმცა, ეს უნდა თქვან პირდაპირ და სასაცილოდ ნუ იხდიან თავს, როდესაც ამბობენ, თითქოს ივანიშვილი არასამთავრობოებზე ზეწოლას ახდენს. რაღაც ვთქვი გიგაურსა და კოჟორიძეზე და ეს მთელ არასამთავრობო სექტორს დაუკავშირეს, როგორ გაბედაო. გავბედე და მომავალშიც გავბედავ. იმავე კითხვებს დავსვამთ პოლიტიკოსებთან და პარტიებთან დაკავშირებით. კეთილი ინებონ და ქვეყნის ინტერესები დააყენონ წინ და თუ ამას ვერ გააკეთებენ, რა თქმა უნდა, გავაკრიტიკებთ“, - განაცხადა ივანიშვილმა.