„ექსპერტები იმ დონის გვყავს რა დონისაც გვყავს მთავრობა, მომღერლები, ფეხბურთელები და ა.შ.“, - ამ განცხადებით თორნიკე შარაშენიძე ექსპრემიერის ბიძინა ივანიშვილის მიერ ექსპერტების მისამართით გამოთქმულ კრიტიკას ეხმაურება.

როგორც „ნიუპოსტთან“ საუბარში შარაშენიძე ამბობს, ივანიშვილს უფლება აქვს ვინც უნდა ის აკრიტიკოს, მაგრამ უნდა გააცნობიეროს, რომ ის არის ყველაზე გავლენიანი ადამიანი ქვეყანაში და მის ყოველ სიტყვას აკვირდებიან.

„მით უფრო აკვირდებიან როცა იგი არასამთავრობოებსა და ექსპერტებს აკრიტიკებს. არავინაა იდეალური და ყველა იმსახურებს რაღაც კრიტიკას, მაგრამ რატომ უნდა მივდგეთ არასამთავრობოებს, როცა გარბის ლარი, როცა საგარეო პოლიტიკაში პრობლემებია. ყველაფერ ამაზე მთავრობა უნდა აგებდეს პასუხს და არა არასამთავრობოები. ხალხს არასამთავრობოების მოღვაწეობა არ აწუხებს, ხალხს აწუხებს ლარი, ეკოლოგიის პრობლემები, კრიმინალი, დანგრეული გზები. შეიძლება ივანიშვილი ექსპერტებს პროფესიონალიზმს უწუნებდეს. მაგრამ მე ვიტყოდი რომ ექსპერტები იმ დონის გვყავს რა დონისაც გვყავს მთავრობა, მომღერლები, ფეხბურთელები და ა.შ“, - ამბობს შარაშენიძე.

ექსპერტი მიიჩნევს, რომ ივანიშვილი მთავრობას დახურულ კარს მიღმა აკრიტიკებს,

„მე მაინც მგონია, რომ ივანიშვილი კარგად ხვდება, რომ მის მიერ დატოვებულ მთავრობას პრობლემები აქვს და მათ დახურულ კარს მიღმა აკრიტიკებს კიდეც. კარგი იქნება თუკი იგი მთავრობის განახლებას დროზე შეუდგება და თუ ამას გააკეთებს ახალი კადრები სწორედ არასამტავრობოებში და ექსპერტებში ექნება საძებნელი“, - განაცხადა შარაშენიძემ.

რაც შეეხება ივანიშვილის მიერ დაანონსებული ექპერტების საქმის შესწავლას, შარაშენიძე ამბობს, რომ ეს „არ ადარდებს“.

„პირადად მე სულაც არ მადარდებს ექსპერტების საქმეების შესწავლა. არც ის არ გამიხეთქავს გულს, ჩემზე რომელიღაც ორგანიზაცია თუ იტყვის რომ ექსპერტის ტიტულს არ ვიმსახურებ. თუკი ვინმეს ჰგონია, რომ ინტერვიუებში ფულს მიხდიან, ძალიან სცდება. მე ჩემი საქმე მაქვს და ჩემი სამსახური, რომლითაც ცხოვრებას ნორმალურად ვახერხებ. არც ის მომწონს ექსპერტს რომ მეძახიან და არც არაოდეს დამიჩემებია ეს ტიტული“, - აცხადებს შარაშენიძე.