"ღარიბაშვილი კიევში მარგველაშვილს გაუშვებს, მერე ისწავლიან უკრაინელები ჭკუას"

სოც.მედია - 15:07, 15 Feb, 2015

5940

საგარეო საქმეთა ყოფილი მინისტრი და საზოგადოება ,,ივერიის“ დამფუძნებელი გრიგოლ ვაშაძე ,,ფეისბუქის“ გვერდზე უკრაინის აღოსავლეთ ნაწილში განვითარებულ მოვლენებზე წერს და ამ მოვლენების ფონზე უკრაინის მიმართ საქართველოს ხელისუფლების პრეტენზიების ”მიზანშეწონილობაზე” და ”დროულობაზე” ამახვილებს ყურადღებას:

”თუ რამის წაკითხვა შეიძლებოდა, იმის წაკითხვის შემდეგ სიტუაცია უკრაინის აღმოსავლეთ ფრონტზე ასე გამოიყურება:
- რუსულმა არმიამ და ტერორისტებმა დებალცევო, დაბა შიროკინო და მარიუპოლი ვერ აიღეს; დებალცევო და შიროკინო თითქმის მთლიანად დანგრეულია;
- უკრაინის შეიარაღებულმა ძალებმა დაუზუსტებელი ინფორმაციით შესძლეს მეორადი არტიომოვსკ-ლუგანსკოე-ლოზოვოე-დებალცევოს გზის დებლოკირება, რაც მათ საშუალებას მისცემს დებალცევოს ალყაში მოქცეული დაჯგუფება მოამარაგონ;
- მთავარი ტრასა არტიომოვსკ-დებალცევო რუსების ხელშია, ისევე როგორც სატრანსპორტო კვანძი ლოგვინოვო;
- ორივე მხრიდან დიდია დაღუპულების და დაჭრილების რაოდენობა.
მეტის გაგება შეუძლებელია. არც უკრაინული და არც რუსული საიტები ოპერატიულ ინფორმაციას აღარ იძლევიან.
ამ დროს საქართველოს "ხელისუფლებას" და/ანუ ივანიშვილს მეტი საქმე არა აქვთ გარდა იმაზე საუბრისა, რა საკადრო გადაწყვეტილებებს ღებულობს სუვერენული უკრაინის პრეზიდენტი. ზოგიერთი "ჩვენი" პარლამენტარი მანდილოსანი პრეზიდენტ პოროშენკოსგან სასწრაფო ახსნა-განმარტებასაც კი ითხოვს. სწორია: რა დროს აღმოსავლეთი ფრონტია, როდესაც "ოცნების" მშვენიერი ნახევარი სეტისფაქციის მოლოდინშია? და თუ პრეზიდენტ პოროშენკოსგან დროულ ახსნა-განმარტებას არ მიიღებენ, ღარიბაშვილი თავის ვიზიტს კიევში გააუქმებს და თავის მაგივრად მარგველაშვილს გაუშვებს.
მერე ისწავლიან უკრაინელები ჭკუას.”- წერს გრიგოლ ვაშაძე.