სააკაშვილის უკრაინის მთავრობაში დანიშვნა ხელისუფლების უნიათობის შედეგია- აბაშიძე

პოლიტიკა - 18:00, 14 Feb, 2015

1938

მიხეილ სააკაშვილის უკრაინაში "რეფორმების საერთაშორისო საბჭოს" თავმჯდომარედ დანიშვნას „თავისუფალი დემოკრატები“ ეხმაურებიან. პარლამენტის ვიცე სპიკერის, ზურაბ აბაშიძის თქმით, უკრაინის ხელისუფლების მიერ ამგვარი ნაბიჯის გადადგმა ხელს შეუშლის ქართულ-უკრაინულ ურთიერთობებს, ხოლო ყოფილი მაღალჩინოსნების უკრაინაში მაღალ თანამდებობაზე დანიშვნა კი მხოლოდ საქართველოს დღევანდელი ხელისუფლების უნიათობის შედეგია.

„პრეზიდენტ პოროშენკოს და უკრაინის ხელისუფლების გემოვნების საკითხია, ვის შეარჩევენ თავის მრჩევლად. ასე რომ, ჩვენ მოგვწონს თუ არ მოგვწონს, ეს მათი გადასაწყვეტია. ამავდროულად მნიშვნელოვანია ის, რომ ქვეყნის შიგნით საქართველოში დღეს მიხეილ სააკაშვილის მიმართ მიმდინარეობს სისხლის სამართლებრივი დევნა და აღძრულია სისხლის სამართლის საქმე, რაც, გარკვეულწილად, სერიოზულად შეუშლის ხელს ორი ქვეყნის ურთიერთობას. ასევე, ეს არის დღევანდელი მთავრობის უნიათობის შედეგი, რომ ვერ მოახერხა უკრაინასთან ისეთი ურთიერთობები შეექმნა, რომ ყოფილი პრეზიდენტი, რომელსაც დღევანდელი ხელისუფლება ედავება ძალიან ბევრ დანაშაულს, უკრაინაში ასეთ მაღალ თანამდებობაზე არ დანიშნულიყო,“ - განაცხადა ზურაბ აბაშიძემ.