ყოფილი პრემიერ მინისტრის ბიძინა ივანიშვილის მოქმედ ხელისუფლებაზე ზემოქმედების შესახებ დასმულ კითხვას საქართველოს მოქმედმა პრემიერ-მინისტრმა ირაკლი ღარიბაშვილმა გერმანული გამოცემა Die Welt-სთვის მიცემულ ინტერვიუში უპასუხა.

"რას გულისხმობთ გავლენაში? ის დიდი ოჯახის, ქართული ოცნების კოალიციის დამფუძნებელია. ჩვენ მჭიდრო ურთიერთობა გვაქვს, მე მასთან 10 წელი ვიმუშავე. ზოგჯერ ვიღებ რჩევებს ყოფილი პრემიერ-მინისტრის - ივანიშვილისგან. ბუნებრივია, როცა კონსულტაციისთვის ისეთ ადამიანს მიმართავ, რომელსაც სწორი რჩევის მოცემა შეუძლია. მას კარგი რეპუტაცია აქვს, ის 20 წლის განმავლობაში უდიდესი მეცენატი იყო საქართველოში".

პრემიერის თქმით, ის ბიძინა ივანიშვილს ძირითადად ეკონომიკურ განვითარებასთან დაკავშირებულ საკითხებზე რჩევებისთვის მიმართავს.