,,ნაციონალური მოძრაობის” განცხადება - ,,ეს იყო დაშინებისა და მუქარის მცდელობა”

პოლიტიკა - 13:24, 13 Feb, 2015

2095

,,ერთიანი ნაციონალური მოძრაობა” აჭარის პროკურატურის მიერ ფრაქცია ,,ნაციონალური მოძრაობა – მაჟორიტარების“ თავმჯდომარის ირაკლი ბარამიძის დაკითხვაზე დაბარებასთან დაკავშირებით განცხადებას ავრცელებს.

,,2015 წლის 4 თებერვალს, აჭარის ავტონომიური რესპუბლიკის უმაღლეს საბჭოში კოალიცია ,,ქართულმა ოცნებამ” დაკარგა უმრავლესობა.

9 თებერვალს, ნაციონალური მოძრაობის წევრების ინიციატივით დაიწყო უმაღლესი საბჭოს საფინანსო-საბიუჯეტო და ეკონომიკურ საკითხთა კომისიის თავმჯდომარის ალექსანდრე ჩიტიშვილის თანამდებობიდან გადაყენების პროცედურა, აქედან 3 დღის შემდეგ, 12 თებერვალს ხელოვნურად შეთითხნილ საქმეზე, აჭარის პროკურატურამ დაკითხვაზე დაიბარა ფრაქცია `ნაციონალური მოძრაობა – მაჟორიტარების~ თავმჯდომარე ირაკლი ბარამიძე.

სამსაათიანი დაკითხვის მთავარი თემა 2011 წელს ქედის მუნიციპალიტეტში, ირაკლი ბარამიძის გამგებლობის პერიოდში, საჩოგბურთო კორტებისა და ფრენბურთის მოედნის მშენებლობა იყო.

კითხვები ზოგად საკითხებს შეეხებოდა. კერძოდ, ბეტონის საფარის ხარისხი 250 მარკის ნაცვლად, რატომ აღმოჩნდა 200 მარკის, თუ რატომ იყო მოედნის შესაღებად საჭირო საღებავი სხვა ფირმის, რატომ განხორციელდა ავტომანქანის შეძენა ქედის გამგეობისთვის და სხვა საკითხები, რომლებსაც არაფერი აქვთ საერთო გამგებლის კომპეტენციასთან და კანონის დარღვევასთან.

ეს იყო დაშინებისა და მუქარის აშკარა მცდელობა უმაღლეს საბჭოში ჩვენს მიერ დაანონსებული საკადრო ცვლილებების განხორციელების ხელშეშლისათვის და პროკურატურის გამოყენებით თანამდებობების შენარჩუნებისათვის“ - ნათქვამია პარტიის განცხადებაში.