ბირთვული ცენტრის 240 თანამშრომელი ნანგრევებში მოჰყვა და გარესამყაროს მოწყვეტილია. ამის შესახებ შაბათს ინფორმაცია ამერიკულმა პორტალმა WND-მ გაავრცელა და წყაროდ ირანის დაზვერვის ყოფილი მაღალჩინოსანი დაასახელა.

პორტალის წყაროს ცნობით, ეს ინფორმაცია მან ფორდოში განთავსებული ობიექტის ერთ-ერთი მცველისგან მიიღო, რომელიც აფეთქების დღეს არ მორიგეობდა. მისი თქმით, აფეთქება იმდენად ძლიერი იყო, რომ 5 კმ-ის რადიუსში ყველა შენობა მნიშვნელოვნად დააზიანა.
აფეთქების შემდეგ ირანის ხელისუფლებამ აფეთქების ადგილიდან 24 კმ-ის რადიუსის ტერიტორია დახურულ სამხედრო ზონად გამოაცხადა. რამდენიმე საათის განმავლობაში შეჩერებული იყო მოძრაობა ჩქაროსნულ ავტომაგისტრალზე, რომელიც თეირანს შიიტების წმინდა ქალაქ კუმთან აკავშირებს.

ბირთვული ობიექტის იმ თანამშრომელთა შესახებ, რომლებიც აფეთქების შედეგად მიწისქვეშ ცოცხლად დამარხულები აღმოჩნდნენ, ბოლო ინფორმაციის გაგება ოთხშაბათს მოხერხდა - მაშველები ვერ ახერხებდნენ სიღრმეში ჩაღწევას.

ბირთვული ობიექტის ლაბორატორიები, სადაც ურანის გამდიდრების პროცესი მიმდინარეობს, მიწის ქვეშ 90 მეტრის სიღრმეში მდებარეობს. გარესამყაროსთან ამ ლაბორატორიებს მხოლოდ ორი კოშკურა აკავშირებს, რომლებიც მთლიანად განადგურებულია. 
განადგურებულია ასევე საავარიო გასასვლელებიც.

წინასწარი ინფორმაციით, ასაფეთქებელი ნივთიერებების კონცენტრირება ლაბორატორიებსა და კოშკურებთან მიზანმიმართულად, თანდათანობით ხდებოდა და აფეთქებაში, სავარაუდოდ, აშშ-ისა და ისრაელის სპეცსამსახურების ხელი ურევია.