"ღარიბაშვილი ერთ თვეში პრემიერი აღარ იქნება... ხაზეინმა კორუფიცაზე ისიც არ დააკავოს"

"ღარიბაშვილი ერთ თვეში პრემიერი აღარ იქნება... ხაზეინმა კორუფიცაზე ისიც არ დააკავოს" - გივი თარგამაძე

პოლიტიკა - 13:39, 12 Feb, 2015

5280

„ნაციონალური მოძრაობის“ წევრი გივი თარგამაძე პრემიერ-მინისტრის განცხადებას ეხმაურება, სადაც ირაკლი ღარიბაშვილმა „ნაციონალები“ და ალასანიას გუნდი თავდაცვის მინისტრის მიზანმიმართულ დისკრედიტაციაში დაადანაშაულა.
როგორც „ნიუპოსტთან“ საუბარში თარგამაძემ განაცხადა, ღარიბაშვილის განცხადება რეალობას აცდენილია.
„რაც ჯანელიძემ თავისი მინისტრობის პერიოდში გააკეთა, რთულია ამაზე მეტი დისკრედიტაცია მას ვინმემ გაუწიოს. ამის შემდეგ ვინმეს მხრიდან მის დისკრედიტაციაზე საუბარი სისულელეა. ღარიბაშვილი ვინმეს მიმართ განხორციელებულ დისკრედიტაციაზე ნაადრევად საუბრობს. რაც შეეხება პოლიციის მიმართ დისკრედიტაციას, პოლიციის დისკრედიტაცია იყო მისი მინისტრობა, შემდეგ - ჭიკაიძის და ეხლა - გომელაურის. ვინმეს დისკრედიტაციაზე პრემიერის განცხადება რეალობას აცდენილია“,- განაცხადა თარგამაძემ.
დეპუტატი კორუფციასთან დაკავშირებით პრემიერის მიერ მთავრობის სხდომაზე გაკეთებულ განცხადებასაც ეხმაურება.

„მან დღეს ისიც განაცხადა, რომ საქართველო ნაკლებად კორუმპირებული ქვეყანა გახდა. გაიხედოს ან ფანჯრიდან ან ტელევიზორს უყუროს, ვის ხალხს იჭერენ კორუფციაზე უკვე ორი დღეა. გაიხსენეთ ბოდოკიას ისტორია, რომელიც მოქმედებდა მერიასთან და საკრებულოსთან შეთანხმებით, აბა მას ამხელა თანხის აღებას ვინ ეკითხებოდა? იგივე, რაც ხდება სასჯელაღსრულების მე-17-ე დაწესებულების დირექტორთან დაკავშირებით. ეს მეტყველებს იმაზე, რომ ყველაფერი რა დარღვევებზეც ჩვენ მიუთითებდით ორი წლის განმავლობაში, ეს ყველაფერი მართალი იყო. ასე, რომ დაუბრუნდეს პრემიერი რეალობას და შეეგუოს იმას, რომ ერთ თვეში პრემიერი აღარ იქნება და იზრუნოს იმაზე, რომ ხაზეინის მიერ კორუფციაზე ან სხვა რამეზე არ იყოს დაკავებული“, - განაცხადა თარგამაძემ.