საპარლამენტო უმრავლესობის ლიდერი დავით საგანელიძე უმრავლესობაში დაპირისპირებას უარყოფს.

ამის შესახებ საგანელიძემ „რუსთავი 2“-თან საუბრისას განაცხადა.

მან ზაქარია ქუცნაშვილის მიერ უზენაესი სასამართლოს თავმჯდომარის პოსტზე კანდიდატურის დაყენებასთან დაკავშირებითაც გააკეთა კომენტარი. მისი თქმით, აღნიშნულ საკითხზე ქუცნაშვილთან საუბარი არ ჰქონია.

"ბოლო სამი დღეა, ერთად ვართ და კითხვა არ დაუსვამს. ამიტომ ძალიან გამიკვირდა, როდესაც უცხოეთში ვიგებ სააგენტოების საშუალებით, რომ ასეთი განცხადებები კეთდება. ალბათ, ვერ გაერკვა სიტუაციაში. კარგია, რომ კომუნიკაცია ჰქონდეთ, ხშირად იარონ პარლამენტში. მე არ ვთვლი დაპირისპირებად. ქუცნაშვილს, ალბათ, ჰქონდა ამის სურვილი, მაგრამ არ გაამხილა," - განაცხადა საგენელიძემ.

საგანელიძე მისი თანამდებობის დატოვების შესაძლებლობასაც ეხმიანება.

"თუ ვინმე ჩათვლის, რომ დათო საგანელიძემ უნდა დატოვოს უმრავლესობის ლიდერის პოსტი, ესეც კარგია იმიტომ, რომ ყველას თუ უყვარხარ, ესე იგი მაინცდამაინც კარგი ადამიანი არ ხარ. ასეთი სამი-ოთხი უმრავლესობაშიც არის. უმრავლესობა თუ გადაწყვეტს, მაშინ მოდით და ვისაუბროთ," - განაცხადა საგანელიძემ.]

შეგახსენებთ, დეპუტატი დავით საგანელიძე, "ქართული ოცნების" ლიდერებმა უზენაესი სასამართლოს თავჯმდომარეობის კანდიდატებზე, პრეზიდენტთან წარმოებული მოლაპარაკებების პროცესის შესახებ გუნდის იდეების უგულებელყოფაში დაადანაშაულეს.