უმრავლესობის წევრი ანი მიროტაძე არასწორს უწოდებს უკრაინის პრეზიდენტის გადაწყვეტილებას, მიხეილ სააკაშვილის მრჩევლად დანიშვნასთან დაკავშირებით.

როგორც მიროტაძემ „ნიუპოსტთან“ საუბარში განაცხადა, ეს გადაწყვეტილება უკრაინის ეროვნულ ინტერესებს საფრთხეს შეუქმნის.

„მიხეილ სააკაშვილი, ზურა ადეიშვილი, ეკა ზღულაძე და სხვები ვერაფრით გაართულებენ საქართველოსა და უკრაინას შორის ურთიერთობას, რადგან ქვეყნებს შორის ურთიერთობა ადამიანებზე არ გადის. ალბათ გარკვეული უხერხულება არის, მაგრამ ალბათ ამაზე პასუხი აქვს ბატონ პოროშენკოს და იმედია, ამ პასუხს მივიღებთ.

თუმცა ეს არ ნიშნავს, რომ ამ პასუხს ვითხოვ როგორც ხელისუფლების წარმომადგენელი. როგორც მოქალაქეს, როგორც ადამიანს, როგორც ხელისუფლების წარმომადგენელს მაინტერესებს, რა ნიშნით მოხდა მისი შერჩევა, თუ გავითვალისწინებთ, რომ მისი გვარი ჩვენს ქვეყანაში ბევრ გაურკვეველ დანაშაულს უკავშირდება. რაც შეეხება იმას, თუ რამდენად წაადგება მიხეილ სააკაშვილი უკრაინას. არ შეიძლება ასეთ კაცს ჩააბარო რაღაცის მართვა და ამის კარგი გამოცდილება გვაქვს. უკრაინას ბევრი პრობლემა აქვს და კიდევ ერთი პრობლემის დამატება საჭირო არ იყო, ეს არის გულშემატკივრის პოზიცია უკრაინელი ხალხის მიმართ. ეს არასწორი გადაწყვეტილებაა და არ შედის უკრაინის ეროვნულ ინტერესებში. ეს აუცილებლად შეუქმნის საფრთხეს უკრაინის ეროვნულ ინტერესებს“, - განაცხადა მიროტაძემ.

საქართველოს ყოფილი პრეზიდენტი, მიხეილ სააკაშვილი უკრაინის პრეზიდენტის, პეტრო პოროშენკოს საერთაშორისო მრჩეველთა საბჭოს თავმჯდომარედ დაინიშნა.