„ნაციონალური მოძრაობა“ მოუწოდებს ხელისუფლებას ყურადღებით გაეცნონ მათი მიერ შეთავაზებულ ანტიკრიზისულ გეგმას და ეკონომიკის გაჯანსაღებისკენ კონკრეტული ნაბიჯები გადადგას.

როგორც პარტიის წევრი ზურაბ ჯაფარიძე აცხადებს, პირველ რიგში გადასახადების დაწევა უნდა მოხდეს, რაც ეკონიმიკის ზრდას სტიმულს მისცემს.

„ლარი აგრძელებს გაუფასურებას. ჩვენ ვხედავთ, რომ მთავრობა არ იღებს არანაირ ქმედით ზომებს, იმასთან დაკავშირებით, რომ მოხდეს ეკონომიკის გაჯანსაღება. ეროვნულ ბანკს აქვს ბერკეტები, რომ ლარის გაუფასურება შეაჩეროს, მაგრამ ეს არის დროებითი ეფექტის მომტანი ბერკეტები. თუ ხელისუფლება არ შეცვლის იმ პოლიტიკას, რომელსაც ის ატარებდა ბოლო ორი წლის განმავლობაში, პრობლემები ექნება ქართულ ეკონომიკას და ეს აისახება ეროვნულ ვალუტაზე და ლარი კვლავ გააგრძელებს გაუფასურებას.

ჩვენ გვინდა მოვუწოდოთ ხელისუფლებას, რომ ყურადღებით გაეცნოს ჩვენს მიერ გამოგზავნილ ანტიკრიზისულ გეგმას, რომელიც შედგება 36 ნაბიჯისგან და გადადგას კონკრეტული ნაბიჯები იმისათვის, რომ დაიწყოს ეკონომიკის გაჯანსაღება. პირველ რიგში უნდა მოხდეს გადასახადების დაწევა, რაც სტიმულს მისცემს ეკონომიკურ ზრდას; უნდა განხორციელდეს რამდენიმე მნიშვნელოვანი ინფრასტრუქტურული პროექტი, რომელიც წინა წლებში იგეგმებოდა და ამ ხელისუფლებამ გააჩერა და უარი უნდა ითქვას ახალ გაუაზრებელ ინიციატივებსა და რეგულაციებზე, რომელიც აფერხებს ეკონომიკურ ზრდას“, - ამბობს ჯაფარიძე.