ევროპულ და ევროატლანტიკურ სტრუქტუტებში ინტეგრაციის საკითხებში საქართველოს სახელმწიფო მინისტრი დავით ბაქრაძე აცხადებს, რომ არ ფლობს არანაირ ინფორმაციას მთავრობაში საკადრო ცვლილებებთან დაკავშირებით.

გავრცელებულ ინფორმაციას იმის შესახებ, რომ თავდაცვის უწყებაში განხორციელებული ცვლილებების გამო, შესაძლოა, თანამდებობა მინისტრმა მინდია ჯანელიძემაც დატოვოს, ბაქრაძე არ ადასტურებს.

"არანაირი ინფორმაცია რაიმე დაგეგმილ ცვლილებასთან დაკავშირებით არ გამაჩნია. რაც შეეხება თავად მინდია ჯანელიძეს, ის ძალიან აქტიურად შეუდგა ამ თანამდებობაზე მუშაობას და ძალიან წარმატებით ართმევს თავს", - განუცხადა ბაქრაძემ ჟურნალისტებს გავრცელებულ ინფორმაციაზე, რომ თავდაცვის მინისტრი შესაძლოა, შეიცვალოს.

დავით ბაქრაძე უკრაინის თემაზე მინსკში დაგეგმილ შეხვედრასაც გამოეხმაურა.

იგი აღნიშნავს, რომ მისი პოზიცია ერთმნიშვნელოვანია და მხარს უჭერს საკითხის მშვიდობიანად მოგვარებას.

"ჩვენი პოზიცია ერთმნიშვნელოვანია. ჩვენ მხარს ვუჭრეთ საკითხის მშვიდობიანად მოგვარებას. საქართველოს პოზიციები სრულ თანხვედრაშია საერთაშორიოსო საზოგადოების პოზიციებთან. ჩვენ თვალყურს ვადევნებთ პროცესებს და იმედი მაქვს, რომ მიმდინარე და დაგეგმილი ფორუმები შედეგად მოიტანს საკითხის მშვიდობიან მოგვარებას", - აღნიშნა ბაქრაძემ.