სამართალდამცავ ორგანოებს ქართული ოცნება პოლიტიკურ იარაღად იყენებს-აბესაძე

პოლიტიკა - 21:54, 10 Feb, 2015

1546

კრწანისის ყოფილი გამგებლის მოადგილი რომეო ფარულავას დაკითხვაზე დაბარებას საკრებულოში ფრაქცია „ნაციონალური მოძრაობა - თბილისის“ თავმჯდომარე ირაკლი აბესაძე პოლიტიკურ დევნად აფასებს. ფარულავა საკრებულოში სავარაუდოდ შუალედური დასკვნის საფუძველზე დაიბარეს, რომელიც საკრებულოს კომისიამ მოამზადა.

„ადგილი გვაქვს ყოფილი თანამდებობის პირების მიზანმიმართულ დევნასთან, რომლებიც კვლავ აგრძელებენ საზოგადოებრივ აქტიურ ცხოვრებას, რომლებიც პრობლემებს უქმნიან დღევანდელ ხელისუფლებას მათი კორუფციული ინტერესების გამოაშკარავებით და სამწუხაროდ, სამართალდამცავი ორგანოები „ქართული ოცნების“ ხელში კვლავ პოლიტიკური იარაღია. ის, რომ დღეს რომეო ფარულავა იკითხება, მაშინ, როდესაც საკრებულოში განხილვა არ დასრულებულა, ამის ნათელი მაჩვენებელია“,- განაცხადა აბესაძემ.

შეგახსენებთ, რომ საკრებულოს სარევიზიო კომისის თავმჯდომარემ კრწანისის ყოფილი გამგებლის ხათუნა ბერძენიშვილის ფინანსური საქმიანობის შესწავლაზე მასალები შინაგან საქმეთა სამინისტროს ანტიკორუფციულ დეპარტამენტში გუშინ გაგზავნა. თუმცა, მოგვიანებით გაირკვა, რომ კომისიას ეს დოკუმენტაცია შესწავლილი არ ჰქონია და ამის შემდეგ, ნუგზარ მალაღურაძემ აღნიშნული დოკუმენტაცია უკან გაითხოვა.