ხმალაძემ კოღუაშვილს სხდომა დაატოვებინა- დაპირისპირება პარლამენტში

პოლიტიკა - 21:09, 10 Feb, 2015

2653

პარლამენტის იურიდიულ საკითხთა კომიტეტში სასოფლო-სამეურნეო მიწის გასხვისებასთან დაკავშირებით მომზადებული ახალი რეგულაციების განხილვამ დეპუტატებს შორის კამათი გამოიწვია. კომიტეტის სხდომაზე მეცნიერმა პაატა კოღუაშვილმა ცვლილებები გააკრიტიკა და გადაწყვეტილების დასაბუთება მოითხოვა.

„ეკონომიკრი ანალიზი და დასაბუთება მანახეთ იმის, რის გამოც ეს გადაწყვეტილება მიიღეთ! ანალიზი არსებობს იმის, თუ რა ინვესტიცია შემოდის?“, - მიმართა კოღუაშვილმა იუსტიციის მინისტრის მოადგილე ალექსანდრე ბარამიძეს.

კოღუაშვილმა განაცხადა, რომ ეკონომიკის სამინისტროს არ აქვს ჩანტარებული არანაირი ანალიზი ამ საკითხთან დაკავშირებით. "

საქართველოს სოფლის მეურნეობის პირობებში მსხვილმასშტაბიან ინვესტიციაზე საუბარი ზედმეტია. თქვენს მიერ მომზადებულ პროექტში საფრთხეები არსებობს და ამას ქართველი ხალხი არ გაპატიებთ. ქართველი გლეხი მიწას იმიტომ ვერ ამუშავებს, რომ მისთვის სათანადო ეკონომიკური ვითარება არ შეიქმნა. ეს პროექტი სოფლიდან გლეხ-კაცის აყრის სტრატეგიაა“, - განაცხადა კოღუაშვილმა, რომელსაც ბარამიძემ მიუგო, რომ ის არაეთიკურად საუბრობდა.

ბარამიძე-კოღუაშვილის კამათში კომიტეტის თავმჯდომარე ვახტანგ ხმალაძე ჩაერთო და კოღუაშვილს მოუწოდა ადგილიდან ნუ საუბრობდა, წინააღმდეგ შემთხვევაში, სხდომას დატოვებდა, რაც საბოლოოდ ასე მოხდა კიდეც.

ცვლილებების მიხედვით უცხოელებს საქართველოში სასოფლო-სამეურნეო დანიშნულების მიწაზე საკუთრების უფლება უბრუნდებათ, რაც გარკვეული პირობების გათვალისწინებით შეიძლება მოხდეს.