უმრავლესობის წევრი ლევან ბერძენიშვილი მიჩნევს, რომ ზაქარია ქუცნაშვილი უზენაესი სასამართლოს თავმჯდომარე ვერ გახდება.

ამის შესახებ „ნიუპოსტთან“ საუბარში ბერძენიშვილმა განაცხადა.

თუმცა დეპუტატი პრობლემას ვერ ხედავს იმაში, რომ პოლიტიკური პარტიის წევრი უზენაესი სასამართლოს თავმჯდომარის კანდიდატების სიაში იყოს.

„ჩვენი პარტიის წევრმა თინათინ ხიდაშელმა წარდგენაზე უარი თქვა, მაგრამ ბატონმა ქუცნაშვილმა უარი არ თქვა. ეს მისი გადასაწყვეტი იყო. მე არამგონია, რომ ქუცნაშვილი უზენაესის სასამართლოს თავმჯდომარე გახდეს, მაგრამ ის, რომ კანდიდატთა სიაშია, ამაში ტრაგედიას ვერ ვხედავ. თუმცა მე მგონია, რომ პრეზიდენტი ქუცნაშვილის კანდიდატურას არ წარადგენს. საერთოდ, პოლიტიკოსობა სირცხვილი არ არის. საიდან გაჩნდა აზრი, რომ არ უნდა იყოს კანდიდატი ასოცირებული არც ერთ პოლიტიკურ პარტიასთან, არ ვიცი. არ არის ეს დანაშაული. დანტე ალიგიერი იყო პოლიტიკური პარტიის წევრი და ქუცნაშვილი რომ არის პარტიული ამაში პრობლემა არ არის. ჩემთვის არაპოლიტიკურობა უფრო დიდი ნაკლია, ვიდრე პოლიტიკური პარტიის წევრობა. არაპოლიტიკურობა ნიშნავს, რომ ქვეყანა ფეხებზე გკიდია. ჩემთვის მთავარია, რომ თავმჯდომარე იყოს კვალიფიციური და კვალიფიციური“, - განაცხადა ბერძენიშვილმა.

საქართველოს პრეზიდენტის ადმინისტრაციაში საზოგადოების წარმომადგენლების მიერ უზენაესი სასამართლოს თავმჯდომარეობის კანდიდატურების დასახელების ეტაპი გუშინ დასრულდა. ოცდათექვსმეტ წარდგენილ პირთაგან, რვამ თავისი კანდიდატურის განხილვაზე უარი განაცხადა. წარდგენილ კანდიდატთა შორის, ერთ-ერთი დეპუტატი, ზაქარია ქუცნაშვილია.