უზენაესი სასამართლოს თავმჯდომარეობის კანდიდატების წარდგენის ვადა პრეზიდენტს დღეს, 19:00 საათზე ეწურება.

პრეზიდენტის ადმინისტრაციაში სხვადასხვა ჯგუფის მიერ უკვე დასახელებულია 20-მდე კანდიდატი. მათ ვინაობას გიორგი მარგველაშვილი საზოგადოებას უახლოეს დღეებში გააცნობს. ეს, სავარაუდოდ, ოთხშაბათს მოხდება.

ამის შემდეგ უზენაესი სასამართლოს მომავალი თავმჯდომარის კანდიდატურაზე პრეზიდენტის ადმინისტრაცია იმსჯელებს და შერჩეულ კანდიდატს დასამტკიცებლად საკანონმდებლო ორგანოს გადაუგზავნის.

„ამ ეტაპისთვის დაახლოებით 20-მდე კანდიდატია დასახელებული, მაგრამ როგორც წესი ასეთ პროცესებში, ძრითადად ბოლო დღეს სახელდება კანდიდატების მეტი რაოდენობა, ამიტომ ჩვენ ველოდებით, რომ დღეს 7-საათამდე კიდევ დასახელდებიან სხვა კანდიდატები.

პრეზიდენტი იღებს სრულ პასუხისმგებლობას, რომ მის მიერ დასახელებული კანდიდატი შესაბამისობაში მოვა დასახელებულ კრიტერიუმებთან,” - განაცხადა საქართველოს პრეზიდენტის მრჩეველმა ადამიანის უფლებათა და მართლმსაჯულების საკითხებში კახა კოჟორიძემ.

შეგახსენებთ, რომ კონსტანტინე კუბლაშვილს უზენაესი სასამართლოს თავმჯდომარის უფლებამოსილება 25 თებერვალს იწურება. უზენაესი სასამართლოს თავმჯდომარე 10 წლის ვადით ინიშნება.