კიდევ ერთი რუსული კომპანია - საქართველოში „გაზ გრუპი“ შემოდის

პოლიტიკა - 15:29, 07 Feb, 2015

4634

კოალიცია „საზოგადოებრივი ინიციატივის“ ინფორმაციით, საქართველოში რუსული კომპანია „გაზ გრუპი“ შემოდის. მათი ვარაუდით, კომპანია სახელმწიფო ტენდერებში მონაწილეობასაც გეგმავს. როგორც ისინი აცხადებენ, „გაზ გრუპის“ შემოსვლით „ოკუპირებული ტერიტორიების შესახებ კანონი“ ირღვევა.

„ეს კომპანია რუსეთის მიერ ოკუპირებულ ტერიტორიებზე საქმიანობს. მას შეთანხმება აქვს გაფორმებული აფხაზეთის დე-ფაქტო ხელისუფლებასთან. ის აღიარებს მათ, როგორც დამოუკიდებელ სახელმწიფოებს. „გაზ გრუპი“ არღვევს „ოკუპირებული ტერიტორიების შესახებ“ კანონს, ამიტომ ის საქართველოში საქმიანობას არ უნდა აწარმოებდეს“, - აცხადებენ „საზოგადოებრივ ინიციატივაში“.

ეკონომიკის სამინისტროს ოფიციალური განმარტება არ გაუკეთებია. მინისტრის მოადგილე ქეთევან ბოჭორიშვილი ამბობს, რომ მას ამ კომპანიის მხრიდან რაიმე კანონის დარღვევის შესახებ ინფორმაცია არა აქვს.

კომპანიამ პრეზენტაცია რამდენიმე დღის წინ თბილისში მოაწყო, სადაც საკუთარი წარმოების მანქანები წარმოადგინა. ჩვეულებრივი სატვირთოს გარდა წარმოდგენილი იყო სასწრაფო დახმარების, სახანძროს და სხვა სახელმწიფო უწყებებისთვის განკუთვნილი ტექნიკა. მათ შორის უკვე ქართული წარწერებით. კომპანიის წარმომადგენელი ამტკიცებს, რომ მანქანები საჩვენებლად იყო შემოყვანილი და უკან წაიყვანეს. ,,გაზელების“ წარმატებულობა აეჭვებს ავტოექსპერტებს, მათი თქმით ავტომანქანების დაბალი ფასი, მისი დაბალი ხარისხით არის განპირობებული, ,,ძალიან ბევრი გაზელი დაიწვა თვითონ დაიწვა“

სხვა სპეცტექნიკასთან ერთად "გაზ გრუპის" ოფიციალურ ვებგვერდზე ასევე არის ინფორმაცია იმის შესახებ, რომ რუსული კომპანია თანამშრომლობას თბილისის მერიასთანაც აპირებს. ჯერჯერობით ეს ინფორმაცია არ დასტურდება. თუმცა, არ არის გამორიცხული, რომ დედაქალაქში არსებული ყვითელი ავტობუსების ნაცვლად უახლოეს მომავლში რუსული "გაზელები" გამოჩნდეს.