,,ყველაფერს თავის სახელი უნდა დაერქვას, ეს არის ზეწოლა რუსთავი 2-ზე“

,,ყველაფერს თავის სახელი უნდა დაერქვას, ეს არის ზეწოლა რუსთავი 2-ზე“ – ოპოზიცია ცვლილებების გადავადებას ითხოვს

პოლიტიკა - 22:02, 06 Feb, 2015

1407

მაუწყებლობის შესახებ კანონში ცვლილებების გადავადებას 5 პარტია პარლამენტის სპიკერს და კომიტეტებისა და ფრაქციების თავმჯდომარეებს სთხოვს. პოლიტიკოსების განცხადებით რეგულაციების ამოქმედება შელახავს მედიის დამოუკიდებლობას, რაც დემოკრატიულ პროცესებზე ნეგატიურად აისახება. პარტიების მიერ ხელმოწერილ დოკუმენტში კონკრეტული რეკომენდაციებია გაწერილი იმ ცვლილებებთან დაკავშირებით, რომელიც უმრავლესობამ მეორე მოსმენით მიიღო. სარეკლამო დროის ნაწილში, კანონპროექტის რამდენიმე წლით გადავადებას ითხოვდა ტელეკომპანია ,,რუსთავი 2“, რომელიც პარლამენტმა არ გაითვალისწინა. კანონის დამტკიცების შემთხვევაში მაუწყებლები უკვე პრეზიდენტს მიმართავენ თხოვნით, ვეტოს უფლება გამოიყენოს.

ცვლილელბებს მხარი მმართველი კოალიციის 60 წევრმა დაუჭირა. ცვლილებებს მხარი არც ,,თავისუფალმა დემოკრატებმა“ დაუჭირეს. ,,როგორც კი ხელისუფლებაში მოვლენ, მაშინვე ავიწყდებათ დაპირებები. დღეს თუ ამბობენ, რომ დიახ ეს შეიძლება რუსთავი 2-ის წინააღმდეგ იყოს მიმართული, ხვალ სხვა ტელევიზიების მიმართაც იგივე დამოკიდებულება ექნებათ“ - აცხადებს ნინო გოგუაძე.

,,ეს არის დამოუკიდებელი ტელევიზიის მიჭირხვნის მცდელობა“ - აცხადებს ,,მემარცხენე ალიანსის“ წევრი სოსო შატბერაშვილი. ოპოზიციის წევრები პარლამენტს მოუწოდებენ ახალი რეგულაციები მესამე მოსმენით მიღება გადადონ და სარეკლამო დროის საათში 20%-დან 12-მდე შემცირება ეტაპობრივად მოახდინონ.

,,თუ ფინანსური დამოუკიდებლობა გაუარესდა მაუწყებლების შესაბამისად, ქვეყნის პოლიტიკური მდგომარეობა გაუარესდება და ეს უკვე ქვეყნის დემოკრატიულობაზე პოზიტიურად არ იმოქმედებს“ - აცხადებს ძაგანია.

,,არსებული კანონპროექტი დააკარგვინებს ფინანსურ დამოუკიდებლობას იმ ტელეკომპანიებს, რომლებიც დღეს ხელისუფლებისგან ვერ კონტროლდება და ერთ-ერთი პირველი არის რუსთავი 2“ - აცხადებს ,,ქართული დასის“ ლიდერი ჯონდი ბაღათურია.

,,ყველაფერს თავის სახელი უნდა დაერქვას და ეს არაფერია, თუ არა ზეწოლა კონკრეტულად ერთ ტელეკომპანიაზე, ამ შეთმხვევაში საუაბრია რუსთავი 2-ზე“ - განაცხადა ,,ეროვნულ-დემოკრატიული პარტიის“ ლიდერმა ბაჩუკი ქარდავამ.

ცვლილებები კანონპროექტში, რომელიც პარლამენტმა ორი მოსმენით უკვე მიიღო, მედიაში და სამაუწყებლო ბადეში ახალ რეგულაციებს ითვალისწინებს, მათ შორის არის სარეკლამო დროის საათში 20-დან 12%-მდე შემცირება, სპონსორების დასახელების და ანონსების დროის შეზღუდვა.

rustavi2.com