ვალერი გელაშვილი, მასზე თავდასხმაში მონაწილე სპეცრაზმელებს შეხვდა

პოლიტიკა - 17:06, 05 Feb, 2015

2543

თბილისის საქალაქო სასამართლოში დეპუტატ ვალერი გელაშვილის საქმეზე მოწმეების დაკითხვა დაიწყო. პირველი მოწმე თავად ვალერი გელაშვილი იყო, რომელმაც სასამართლოს ჩვენება უშუალოდ ინციდენტსა და მანამდე მომხდარ მოვლენებზე მისცა.

გელაშვილმა პროცესზე განაცხადა, რომ მისი ინიციატივით და პროკურატურის ორგანიზებით, შეხვდა იმ სპეცრაზმელებს, რომლებიც ამ საქმის გახსნის ინიციატორებად ითვლებიან და რომლებმაც ერთობლივი განცხადებით, გასული წლის აპრილში მთავარ პროკურატურას მიმართეს. სწორედ ეს სპეცრაზმელები იძლევიან ბრალდებულთა მამხილებელ ჩვენებებს.

როგორც გელაშვილმა განაცხადა, პროკურატურის შენობაში, შეხვედრას პროკურატურის ისეთი მაღალი თანამდებობების პირები ესწრებოდნენ, როგორიც მთავარი პროკურორის პირველი მოადგილე ირაკლი შოთაძეა.

„სპეცრაზმელები, რომლებმაც მე სიკვდილის პირამდე მცემეს, სხვა ადგილზე არც შემხვდებოდნენ და არც დათანხმდებოდნენ რადგან მე, გამწარებულმა გელაშვილმა ანგარიშსწორება არ ვცადო. მხოლოდ პროკურატურაში და თანამდებობის პირებთან ერთად შეხვედრაზე დამთანხმდებოდნენ“, - განაცხადა ვალერი გელაშვილმა.

ამასთან, გელაშვილის ადვოკატის ოთარ კახიძის განცხადებით, დაზარალებულსა და მოწმეს შორის კომუნიკაციის ორგანიზების უფლება პროკურატურას არ აქვს.

„პრაქტიკულად ეს იყო სკანდალური ინფორმაცია. ეს იყო მოწმეების მიყვანა პროკურატურის საგამოძიებო ნაწილში მთავარი პროკურორის მოადგილის თანდასწრებით და ამ მოწმეებზე განხორციელდა ზეწოლა, რადგან მას შეახვედრეს ვალერი გელაშვილი, რომელმაც სპეცრაზმელებისგან მიიღო ბოდიში. დაზარალებულსა და მოწმეს შორის კომუნიკაციის ორგანიზება პროკურატურას არ შეუძლია, გარდა განრიდება-მედიაციისა, რომელიც არასრულწლოვანთა მართლმსაჯულებას ეხება“,-განაცხადა ოთარ კახიძემ.

დეპუტატი ვალერი გელაშვილს 2005 წელს სცემეს. საქმის გამოძიება ხელისუფლების შეცვლის შემდეგ ხელახლა დაიწყო.