"ვის აგინებ, ამხელა კაცი ხარ, გაგინგრევ მაგ სახეს"- დეპუტატებმა "უფასო ფულის" გამო იჩხუბეს

პოლიტიკა - 15:45, 05 Feb, 2015

6393

პარლამენტის საფინანსო საბიუჯეტო სხდომაზე პენსიის და „უფასო ფულის“ საკითხზე საუბარი სიტყვიერ დაპირისპირებაში გადაიზარდა.

უმცირესობის წევრის გოგა ხაჩიძის განცხადებით, ის „ქართულ ოცნებას“ წინასაარჩევნო დაპირებების შესასრულებლად კონკრეტულ მექანიზმებს სთავაზობს. მმართველი გუნდის წარმომადგენლები კი ხაჩიძის ინიციატივას არასერიოზულს უწოდებენ.

„რა არი ბოლო-ბოლო ამისთვის გვცალია?- განაცხადა კომიტეტის თავმჯდომარემ და მიკროფონი გამორთო , რის შემდეგაც გოგა ხაჩიძემ უმრავლესობის წევრებს ინიციატივასთან დაკავშირებით კონკრეტული მოსაზრებების გამოთქმა მოსთხოვა.

„კონკრეტული მოსაზრება გამოთქვით და გავიგებთ რას ფიქრობთ ბიძინა ივანიშვილის დაპირებაზე.“- განაცხადა ხაჩიძემ.

კომიტეტის სხდომაზე უმცირესობის წევრების მისამართით „ოცნების“ წევრმა ომარ ნიშნიანიძემ შეიგინა, რის შემდეგაც დაპირისპირება ზურაბ ჯაფარიძესა და მას შორის გაგრძელდა.

„ვის აგინებ, ამხელა კაცი ხარ, გაგინგრევ მაგ სახეს, შენ ვინ გგონია შენი თავი?“- მიმართა ჯაფარიძემ ნიშნიანიძეს.

„შემაგინა, ამხელა კაცია , ვითმენ რა ხანია, ასაკს ვცემ პატივს.“- განაცხადა ზურაბ ჯაფარიძემ.

ომარ ნიშნიანიძემ კი კომიტეტის წინაშე მოთხოვნა დააყენა, რომ საქართველოდან გაზიდული ქონება „ნაციონალებს“ უკან დააბრუნებინონ.

„რაც გაზიდეს, ამ ყაჩაღებმა საქართველოდან დავაბრუნებინოთ უკან, ეს იქნება სამართლიანობის აღდგენა“ - აღნიშნა ნიშნიანიძემ.

გოგა ხაჩიძემ კომიტეტის წევრებს განუცხადა, რომ აღნიშნული ინიციატივა „უფასო ფულთან“ და უპროცენტო კრედიტებთან დაკავშირებით, არა მისი მოგონილი, არამედ ბიძინა ივანიშვილის წინასაარჩევნოდ მიცემული კონკრეტული დაპირებაა. ფაქტის დასამტკიცებლად მან კომიტეტის წევრებს ივანიშვილის წინასაარჩევნო გამოსვლის ჩანაწერიც მოასმენინა.