შერიგებისა და სამოქალაქო თანასწორობის საკითხებში სახელმწიფო მინისტრი პაატა ზაქარეიშვილი აცხადებს, რომ მოქალაქეებს აქტიურად ხვდება და ამ მხრივს შენიშვნებს არ მიიღებს.

მინისტრი სოფელ ჯარიაშენის მოთხოვნას გამოეხმაურა და აღნიშნა, რომ ადგილზე არ ჩავიდა იმის გამო, რომ ამის აუცილებლობა არ იყო. მან ასევე უარყო ინფორმაცია, რომ ჯარიაშენში ოკუპანტებმა საზღვარი გადმოწიეს.

"მე ჩემპიონი მინისტრი ვარ. მე არ ვიცი, ვინ რას ამბობს. მოვუწოდებ ამის მთქმელს, ენა დაასველოს," - განაცხადა პაატა ზაქარეიშვილმა.

სოფელ ჯარიაშენის მოსახლეობის ინფორმაციით, რუსმა ოკუპანტებმა საოკუპაციო ზოლი კვლავ გადმოწიეს და მათ დამატებითი პრობლემა ექმნებათ. ადგილობრივები მინისტრთან შეხვედრას და დახმარებას ითხოვენ.