კონტროლის პალატის ყოფილი ხელმძღვანელის, სულხან მოლაშვილისთვის კომპენსაციის გადასახდელად იუსტიციის სამინისტროს 22 223 ევრო გამოეყო.

ამის შესახებ პრემიერ-მინისტრის ბრძანებაშია ნათქვამი, რომელიც მთავრობის ადმინისტრაციის ვებგვერდზეა განთავსებული.

"ადამიანის უფლებათა ევროპული სასამართლოს მიერ საქმეზე "სულხან მოლაშვილი საქართველოს წინააღმდეგ" 2014 წლის 30 სექტემბერს გამოტანილი გადაწყვეტილების აღსრულებისა და საქართველოს კანონმდებლობით განსაზღვრული გადასახადის დასაფინანსებლად, საქართველოს ფინანსთა სამინისტრომ, "საქართველოს 2015 წლის სახელმწიფო ბიუჯეტის შესახებ" საქართველოს კანონით გათვალისწინებული წინა წლებში წარმოქმნილი დავალიანებების დაფარვისა და სასამართლო გადაწყვეტილებების აღსრულების ფონდიდან, საქართველოს იუსტიციის სამინისტროს გამოუყოს 22 223 (ოცდაორი ათას ორას ოცდასამი) ევროს ეკვივალენტი ლარი", - ნათქვამია პრემიერ-მინისტრის ბრძანებაში.