საპარლამენტო უმრავლესობის წევრი, გიგლა აგულაშვილი აცხადებს, რომ „ნაციონალური მოძრაობის“ წევრთა განცხადებების მიზეზი პოლიტიკურად მოტივირებული დაკავებების შესახებ, ნათელია და ის გამოწვეულია ნებისმიერი სამართლებრივი ქმედებით, რომელიც მათი გუნდის წევრს უკავშირდება.

„ნებისმიერი დაკავება მათთვის არის პოლიტიკურად ანგაჟირებული, თუ ეს ეხება მათი პოლიტიკური გუნდის წევრს ან ადამიანს, რომელიც პოლიტიკურად მათ მიმართ არის სიმპატიით განწყობილი. შესაბამისად, ამ კონტექსტიდან ყოველთვის თავისუფალ რეჟიმში და წმინდა სამართლებრივად განვიხილავ ამ პროცესს,“ - განაცხადა დეპუტატმა.

შეგახსენებთ, რომ საქართველოს პროკურატურამ დღეს 11 ყოფილი ძალოვანი მაღალჩინოსანი დააკავა და ზურაბ ვაზაგაშვილის მკვლელობის საქმე გახსნილად გამოაცხადა.