დღეს ზუგდიდის ცენტრში საპროტესტო აქცია გაიმართა ადგილობრივი ხელისუფლების რამდენიმე წარმომადგენელმა და მოქალაქეთა ნაწილმა აქციაზე ზუგდიდში თავდაცვის ყოფილი მინისტრის, ამჟამად პატიმრობაში მყოფი ბაჩო ახალაიას წიგნის პრეზენტაცია გააპროტესტა. ახალაიას მხარდამჭერთა განცხადებით, აქციაზე ხალხის მოყვანა მოტყუებით მოხდა და რაიონებიდან მოსახლეობა პრემიერთან შეხვედრის საბაბით ჩამოიყვანეს .

ზუგდიდში განვითარებულ მოვლენებთან დაკავშირებით „ნიუპოსტი“ ქალაქ ზუგდიდის საკრებულოს თავმჯდომარეს მერაბ ქვარაიას დაუკავშირდა.

ადგილობრივი ხელისუფლების წარმომადგენლის განცხადებით, შეუძლებელია ამდენი ადამიანი აქციაზე მოტყუებით მიიყვანო. ქვარაიას თქმით, გაკვირვებას არ უნდა იწვევსდეს ის, რომ ამ ადამიანებს ახალაიების მიმართ პროტესტის გრძნობა გააჩნიათ:

„აბსოლუტური სისულელეა ის , რომ დღეს ადამიანი ისე მივიდეს აქციაზე, რომ არ იცოდეს, სად მიდის , რისთვის მიდის და რას აპროტესტებს. ან ვინმეს უკვირს საზოგადოების მხრიდან პროტესტი ახალაიების და იმ რეჟიმის მიმართ, რომელიც 9 წლის განმავლობაში ატერორებდა სამეგრელოს მოსახლეობას? დღევანდელი აქცია იყო იმ სისხლიანი ხელისუფლების მმართველობის შედეგი, ადამიანებმა გააპროტესტეს ფარსი- წიგნის პრეზენტაცია, რომლის მიღმაც მუდმივად არის ინტერესი პოლიტიკური გაცოცხლებისა. შესაბამისად საზოგადოებამ ამასთან მიმართებაში გამოხატა თავისი პროტესტი.“- აღნიშნა მერაბ ქვარაიამ.

ქალაქ ზუგდიდის საკრებულოს თავმჯდომარემ აქციის ორგანიზატორებთან დაკავშირებითაც ისაუბრა, ასევე მან აღნიშნა, რომ მიუხედავად იმისა, რომ ის ხელისუფლების წარმომადგენელია, აქციაზე ის მისული იყო, როგორც იმ საზოგადოების წევრი, რომელსაც ახალაიების და ნაციონალური მიმართ პროტესტის გრძნობა გააჩნია:

„რამდენადაც ჩემთვის ცნობილია ეს ორგანიზებული იყო „საზოგადოებრივი დარბაზის“ მიერ. ძალიან ბევრი ადამიანი მოვიდა ამ აქციაზე, მათ შორის ვიყავი მეც, მიუხედავად იმისა, რომ ვარ საჯარო მოხელე ვთვლი , რომ უპირველეს ყოვლისა ვარ საზოგადოების წევრი და ვალდებულად ვთვლიდი თავს ვყოფილიყავი იქ, სადაც ეს ადამიანები გამოთქვამდნენ პროტესტს. რაც ყველაზე მთავარია პროტესტი იყო მშვიდობიანი, მიუხედავად იმისა რომ მაღალი იყო ტემპერატურა და მაღალი იყო უკმაყოფილება ახალაიების კლანის და ნაციონალური მოძრაობის ოდიოზური ფიგურების მიმართ. საბოლოო ჯამში აქციამ მშვიდობიანად ჩაიარა, პოლიციამ ყველაფერი გააკეთა იმისთვის რომ აქციაზე სერიოზული დაპირისპირება არ მომხდარიყო.“- განაცხადა მერაბ ქვარაიამ.