საქართველოს და უკრაინის მოვლენები ერთ კონტექსტში უნდა განიხილებოდეს-ბერუჩაშვილი

პოლიტიკა - 15:59, 31 Jan, 2015

1571

ამერიკის შეერთებულ შტატებში ოფიციალური ვიზიტით მყოფმა საგარეო საქმეთა მინისტრმა თამარ ბერუჩაშვილმა რუსეთის აგრესიულ პოლიტიკაზე ისაუბრა და განაცხადა, რომ უკრაინასა და საქართველოში განვითარებული მოვლენები ერთ კონტექსტში უნდა განიხილებოდეს. ბერუჩაშვილის თქმით ევროატლანტიკური გეგმების განსახორციელებლად საქართველოს საერთაშორისო თანამეგობრობის მხრიდან უფრო აქტიური დახმარება სჭირდება.

„ასოცირების ხელშეკრულების და ნატოს არსებითი პაკეტის განხორციელებას საქართველოსთვის გადამწყვეტი მნიშვნელობა აქვს, მაგრამ ამისათვის საჭიროა გავუმკლავდეთ დრამატულად შეცვლილ უსაფრთხოების გარემოს. საქართველოს ტერიტორიების 20% ჯერ კიდევ ოკუპირებულია რუსეთის მიერ და ის აგრძელებს ე.წ. ბორდერიზაცისს პროცესს. უფრო მეტიც, სოხუმის საოკუპაციო რეჟიმთან რუსეთმა ხელი მოაწერა ხელშეკრულებას უფრო ღრმა ინტეგრაციისთვის და იმავეს ამზადებს სამხრეთ ოსეთთან, ეს საქართველოს ტერიტორეიების ანექსიისადმი გადადგმული ნაბიჯია. აღსანიშნავია, რომ ამ ვითარებაში უკრაინის შემთხვევა არ არის ცალკე საკითხი, ეს დიდი რუსული სცენარის ერთი ნაწილია, რაც მისი დომინანტობის გაზრდას და გავლენის სფეროების შექმნას გულისხმობს. ჩვენ დავისაჯეთ სუვერენული არჩევანისათვის, რომ გავხდეთ ევროპული და ევროატლანტიკური საზოგადოების წევრი. უსაფრთხოების გარანტიების გარეშე კი ძალიან რთული იქნება რეფორმების გასატარებლად ენთუზიაზმისა და ხალხის მხარდაჭერის შენარჩუნება, იმედი მაქვს დასავლეთი გაერთინდება ერთიან ღირებულებებზე აგებული პარტნიორობის დასაცავად“,-განაცხადა თამარ ბერუჩაშვილმა.